Shillong, Lber 13
Ha ka Sngi Balang ki pulit ka Ri-Bhoi ki la ïoh ban kurup biang sa ïa ki tiar shna bom, ka lama jong ka seng kieng atiar ka Hynñiewtrep National Liberation Council (HNLC) bad ka pistol na Ri-Bhoi District.
Ka jingïoh jong ki pulit ban kurup biang ïa kitei ki tiar ka la long hadien ka jingphla jong uwei napdeng saw ngut ki dkhot Sleeper Cell ka HNLC kiba la shah kem ha ka Sngi Ba-ar, uba la ïalam lynti ïa ki pulit ban pynlong jingkhynra ïa ka ïing sah.
U Superintendent of Police (SP) ka Ri-Bhoi u la pyntip ba ki tiar ba la ïoh kurup kata nalor ka pistol bad ka lama ka seng HNLC, ki kynthup ruh ïa ki tiar shna bom kata katto-katne ki galatin stick, ki detonator, ki ignition fuse.
Ki pulit ki la ong ba ka jingïoh kurup ïa kitei ki tiar ha ka Sngi Balang ka la long ha ka jingbteng jong ka jingtohkit hapoh ka mukotduma ba la pynrung ha thanat Nongpoh hapoh ka kyndon 120B/121A IPC pule lang bad ka kyndon 10/13/18 UA (P)Act bad ka kyndon 5/6 Explosives substance act. La ong ba ha ka jingtohkit la shem ba ki nongïalam ka HNLC na Bangladesh ki la ai jingbthah ïa ki dkhot ka ‘Sleeper Cell’ ba kin pynbthei bom ha Shillong bad Nongpoh. Shuh shuh la ong ruh ba dei kane ka kynhun Sleeper Cell kaba ju pynher ïa ka lama jong ka HNLC ha ki snem ba la leit noh halor ka jingbthah jong ki nongïalam na Bangladesh.
La ong ruh ba ki nongïalam ka HNLC ki la pynbiej ban ai da ka song pisa kaba heh kynthup ka kali thymmai ïa ki dkhot ka Sleeper Cell ba kin pynbthei bom IED. Ka jingtohkit mynta ka dang ïaid shakhmat ban nang lapdien shuh ïa ki kam ka ‘Sleeper Cell’ jong ka HNLC.
