Shillong, Lber 13
U nongïalam ka Congress Legislature Party (CLP) u Bah Ronnie V Lyngdoh u la kynthoh ïa ka All India Trinamool Congress (TMC) ba ka don ka jingsngewthuh naba rieh bad ka Bharatiya Janata Party (BJP) haba ïadei bad kane ka ilekshon sha Ïingdorbar Lok Sabha bad u la buh jingkylli balei ka TMC kam treh pynbna ba ka don ka jingsngewthuh bad ka Congress ha West Bengal haba ïadei bad ka jingïasam ïa ki konstiwensi ban ïakhun ïa ka ilekshon.
Haba pyrshah ïa ka jingkren kaba dang shen jong u nongïalam ka TMC u Dr Mukul Sangma uba la kynnoh ïa ka Congress ba ka la ïaid shakhmat ban pynbna kyrtong ha Meghalaya, u Bah Ronnie u la ong ba lada ïanujor bad ka West Bengal kaba don 42 tylli ki konstitwensi, ka Jylla Meghalaya ka don tang ar tylli ki konstitwensi.
Kumta u la ong ba lada ka TMC ka ong ba ka Congress ka la ïaid shakhmat ban pynbna kyrtong ha Meghalaya ka paw ba ka TMC hi kam treh ban ïatreilang bad ka Congress.
“Balei ka TMC kam pynbna ba ka kloi ban mynjur ban ïasam ïa ki konstiwensi ha West Bengal. Kumta ngi kwah ban kylla ïa ki nongïalam ka TMC hato ki la don ka jingsngewthuh kaba rieh bad BJP khnang ban khanglad ban ïoh ïa ki vote. Ki paidbah ki kwah ban ïohi ba ka BJP ka dei ban rem kaba wanrah ki jingsngew ïapher bad kaba kwah ban pynshit ha kiba bun ki mat.
Kumta une u nongïalam ka Congress ha Meghalaya u la ong ba mynta ka jingkylli ka long ba balei ka TMC kaba donlang ha ka INDIA bloc kam wan sha ka jingsngewthuh ban ai lang ïa ki konstiwensi ban ïakhun ïa ka ilekshon Lok Sabha.
U la ong ba ha West Bengal ki don bun bha ki vote jong ki ritpaid bad lada kine ki wanlang hajuh kan long ka jingkhlaiñ khamtam ha West Bengal kaba don 42 tylli ki konstitwensi.
“Namarkata, lada ki 2 tylli ki konstitwensi ki long kiba kongsan bad donkam bha na bynta ka TMC, bad lada ki 42 tylli ki konstitwensi kim long kiba kongsan, kata hi ka paw ïa ka jinglong ar maloi.
Shuh shuh u la ong ba ka BJP ka ju pyndonkam da ka CBI, ED, IT ban kem ïan-ïano, hynrei ha West Bengal ym don kum kane ka jingjia kaba pynlong ban mih ka jingkylli hato ka don ka jingsngewthuh naba rieh hapdeng ka BJP bad TMC?
U la ong ba ki paidbah mynta ki bishar bad ai ka vote jong ki ïa ki seng kiba wanlang ban ïakhun na ka bynta ka synshar paidbah kaba laitluid bad kaba shngaiñ.
