Shillong, Lber 13
U ophisar Indian Forest Service (IFS) uba bat kum u Chief Conservator of Forest ka Jylla, u la pynkut noh ïa la ka jingim da kaba dkhat jubor ha u tyllai phasi ha ïing sah lade ha nongbah Shillong.
U Superintendent of Police (SP) ka East Khasi Hills u Rituraj Ravi ha ka jingtip kaba u la ai, la ong ba une u ophisar IFS u la dkhat ïa la ka jingim ha ka Sngi Balang ha ka ïingsah jong u kaba don shajan ka Lady Keane College ha ka por kumba 7.30 mynstep eiei.
U SP u la ong ba utei u heh ophisar u dei ba la tip kyrteng kum u N Luikham bad u dei na ka Indian Forest Service jong u snem 2003. U Luikham, uba la don kumba 50 snem ka rta, u la long u Chief Conservator of Forests jong ka Sorkar Meghalaya haduh ka sngi ba khatduh.
Ïa ka met jong u Luikham la rah noh sha Civil Hospital Shillong ban leh ïa ka post mortem. Haduh mynta ym pat tip ïa ka daw kaba la pynlong ïa utei u heh ophisar ban dkhat ïa la ka jong ka jingim.
U Myntri Rangbah ka Jylla, u Conrad K. Sangma ha ka Sngi Balang u la leit sngewlem sha ïingsah u ophisar Indian Forest Service (IFS), uba la khlad noh hadien ba u la dkhat ïa la ka jingim ha u tyllai phasi ha ka step Sngi Balang.
Ïa utei u heh ophisar la tip kyrteng kum u N. Luikham bad u dei na ka Indian Forest Service jong u snem 2003.
“Ka long ka khubor kaba pynkyndit kaba ngi la ïoh pdiang bad katto-katne por ngam shym la lah ban ngeit halor kane. Nga kum u Myntri Rangbah bad kum u Myntri ba peit ïa ka tnad khlaw, nga la ïoh lad ban trei bad u ha kiba bun ki liang bad na ka por sha ka por, u Chief Secretary bad ma nga, ngi ju ïakren halor ka tnad khlaw bad man ba ngi ïakren, ka ju mih beit ka kyrteng jong u namar u long u briew uba minot ha ka kam,” la ong u Sangma haba ai jingkren ha ka jingïalang duwai ha ïingsah utei u ophisar.
U la ong ruh ba ka long kaba eh ïa u ïa mynta ban ong eiei halor kane hynrei u ngeit ba u Chief Secretary un kynmaw ïa kito ki por ha kaba ki dang pyrkhat ban bynshet kam shuh-shuh ha u.
“Hooid, ka long ka jingkyndit haba ngi la ïohsngew ïa ka khubor bad ngam don ktien eiei ban ong mynta. Kane ka dei ka por ba ngi baroh ngi dap da ka jingkhia khamtam ïa ki bahaïing hasem. Na ka liang ka Sorkar bad ka tnad khlaw baroh kawei, ngi la duh noh ïa u briew uba kongsan,” la ong u Sangma.
U la ong ruh ba u synñiang u bynhei uba utei u heh ophisar u la noh ki long kiei-kiei ki ban kynmaw bad ka long ruh ka jingduhnong kaba khraw ïa ka Sorkar Jylla.
U Myntri Rangbah u la ïathuh ruh ba u dang don sha Ri-lum Garo hynne ka step ha ka por ba u la ïohsngew shaphang katei ka khubor ba sngewsih bad kumta u la wanphai noh mar-mar sha Shillong.
“Ngi don lang ban kyrshan ïa ka ïing ka sem ha kum kane ka por,” u la ong.
“Kine ki long ki por kiba eh ïa ngi ban sngewthuh halor kaei kaba jia ne kaei kaba u Blei u thmu bad kum ki briew ngin hap ban shu pdiang ïa kaei kaba la jia bad ngeit bad aiti ïalade ha u Blei bad ai ba un lam lynti ïa ka ïing ha kum kane ka por,” u la ong.
Shuh shuh u la ban biang ba ka Sorkar ka don ryngkat bad ka ïing ha baroh ki liang, naba ka long ka jingduh kaba khraw ym tang ïa ka ïing, hynrei ïa ka Sorkar Jylla kumjuh ka tnad khlaw.
U Luikham, uba la don kumba 50 snem ka rta, u la long u Chief Conservator of Forests jong ka Sorkar Meghalaya haduh ka sngi ba khatduh.
Utei u heh ophisar u la phasi ïalade ha ka por kumba 7:30 mynstep ha ka ïingsah jong u kaba don hajan ka Lady Keane College.
Hadien kane, ïa ka met u Luikham la rah noh sha Civil Hospital, Shillong ban leh ïa ka ‘Post Mortem’. Haduh mynta ym pat tip na kaei ka daw utei u heh ophisar u la dkhat ïa la ka jong ka jingim.
