Shillong, Lber 13
Ka long ka jingkmen kaba khraw ïa ka shnong Lawjynriew Nongthymmai baroh kawei ba ka la ïoh ban plie ïa ka mala balai jong ka ïing treikam ka Dorbar Shnong kaba la sdang ban tei naduh u snem 2022.
Ka jingtei ïa katei ïing mala balai la bei pisa da ka sorkar jylla lyngba ka Chief Minister Development kaba kot T. 15 lak.
Ïa katei ka ïing mala la plie paidbah da ka Myntri ka sorkar jylla bad kaba dei ruh ka kyrtong jong ka seng National People’s Party (NPP) ka ban ïakhun ïa ka ilekshon MP napoh ka Shillong Parliamentary Constituency, ka Dr. Mazel Ampareen Lyngdoh ha ryngkat ka jingïadonlang jong ka Dr. Jasmine Lyngdoh, u Rangbah Shnong ka thaiñ, u Bah SB Kharshandi nalor ki nongkitkam ka Dorbar Shnong bad u Dr. Rev JF Jyrwa bad kiwei-kiwei de.
Haba ai jingkren ha katei ka sngi, na ka liang ka Dr. Mazel Ampareen Lyngdoh, ka la ong ba katei ka ïing treikam ka long kaba biang bha na ka bynta ka jingpyndonkam jong ki nongshong shnong khamtam lei-lei jong ka Dorbar Shnong na ka bynta ka jingbha jingmiat jong katei ka shnong hi baroh kawei.
Ka Dr. Ampareen ka la ong ruh ba ka sorkar kan sa noh jingïarap biang ïa katei ka Dorbar Shnong na ka bynta ban ker bad pynitynnad ïa katei ka ïing mala.
“Ngin sa leh ïa kata na ka liang jong ka sorkar, ban shu kular ka long kaba bakla hynrei ngi lah ïohi ba ka lah don ha ka jingmut jong ngi, ngin peit bad ngin bteng ïa kane ka kam kaba donkam kyrkieh”, la ong ka Dr. Ampareen.
Shuh shuh ka la ong ba kum ka sorkar ka don jingngeit ba nangne shakhmat ka hap ban aibor ïa ki nongshong shnong, ki nongpynïaid shnong namarba ha kum kane ka khia ka shon, ka dei tang ka dong bad ka shnong ka ban lah ban ïalam ïa ngi ba ngin lah ban lah ban ai ïa kaba khuid, kaba suba, kaba shai bad kaba ïohi lang baroh.
“Nga sngew ba ka jaka kaba ngi lah ban shaniah bha ha ka jingshem jong nga bad ha ka jingai shakri ïa u paidbah ka dei hi ka Dorbar Shnong”, la ong ka Dr. Ampareen
Ka la ong ba kum ki nongshong shnong bad ka Dorbar Shnong ki dei ban tei ïa katei ka jaka bad ba kan long ka jaka ka ban ai jingmyntoi bad ka la ong ba wat la katei ka projek ka lah ban shimpor shisnem ne arsnem ne palat ïa kata hynrei kum ka sorkar ka kwah ban ïohi ba hashwa jong u snem 2028 ba katei ka projek kan long kaba la pyndep.
“Nga kitbok kitrwiang da ka jingkmen kaba khraw, nga aiti ïa kane ka ïing treikam na ka bynta ki nongshong shnong jong ka Lawjynriew hi baroh kawei”, la pynkut ka Dr. Ampareen.
