Shillong, Lber 13
U Nongïalam ka Congress Legislature Party (CLP) u Bah Ronnie V Lyngdoh u la ong ba ka jingpyntreikam ïa ka Citizenship Amendment Act (CAA) da ka Sorkar Kmie ba la lamkhmat da ka BJP ha shwa ka ilekshon Lok Sabha ka dei tang ka politik taddor jong ka BJP ban pharia ïa ki paidbah ha ka kyrteng jong ka niam.
U Bah Ronnie uba dei ruh u MLA ka Mylliem u la ong ba ka seng Congress ka pynrem ïa kane ka jingleh bad kan pyrshah ïa kane ka aiñ jong ka Sorkar India, bad u la kyrpad ïa ki paidbah ka ri India ba ki dei ban jied ïa ka seng kaba ailad ban mane blei laitluid, ka ban ïada ïa ka riti synshar bad ka ban pynneh ïa ka synshar-khadar paidbah.
Haba kylli halor ka jingpynbna jong ka Sorkar India ba ïa ka CAA la pyllait na ka jingpyntreikam ha ki jaka ba hap hapoh ka Khyrnit Hynriew, kynthup ïa ka Jylla Meghalaya, u Bah Ronnie u la ong ba donkam ban pynpaw ïa kane ha ki kyndon (rules) jong ka CAA, hangta yn sa ngeit ba la pyllait shisha ïa ka CAA na ki jaka jong ka Khyrnit Hynriew.
