Shillong, Lber 13
Hadien ba kiba bun ki jylla thaiñ Shatei Lam-Mihngi ka ri ki la ïakhih ban pyrshah halor ka jingpyntreikam jong ka sorkar pdeng ïa ka Citizenship Amendment Act (CAA) 2019, na ka liang ka Dr. Mazel Ampareen Lyngdoh kum Myntri ka sorkar jylla bad kumjuh ka kyrtong jong ka seng National People’s Party (NPP) ka ban ïakhun ïa ka ilekshon MP napoh ka Shillong Parliamentary Constituency, ka la ong ba ka kwah ban pynshai bad pynkynmaw ïa ki paidbah ka jylla ba ïa ka CAA la dep ban ïakren la bun snem mynshwa bad kane kam dei satia ka mat ïakren kaba dang thymmai.
Haba kylli ba kum ka kyrtong MP ka ban aireng ha katei ka ilekshon, kaei ka khubor ba kaba ka don ne kaei ka jingkular ba ka lah ban ai sha ki paidbah khnang ba kane ka aiñ kan nym treikam hapoh ka jylla, ka Dr. Ampareen ka la ong ba ka sorkar jylla ha kawei ka sur ka la phah kyntien sha ka sorkar pdeng ba kum ka jylla Meghalaya kan nym shah ïa ka jingpyntreikam ïa ka CAA namar ka jylla ka don ïa ki kyndon ne ki aiñ jingïada lyngba ka riti synshar jong ka ri bad ka dei ruh kata ka jylla kaba don ïa ka Khyrnit Hynriew.
“Ka sorkar jong ngi hapoh kawei ka sur, ngi la phah kyntien shapoh ka sorkar India ba ngin nym shah ïa ka jingpyntreikam ïa ka CAA ha kane ka jylla ka jong ngi namar ngi don ïa ki kyndon jingïada lyngba ka riti synshar ka Ri ba ngi dei kata ka jylla kaba don ïa ka Khyrnit Hynriew “, la ong ka Dr. Ampareen.
Haba kren sha ki katto katne ki lad pathai khubor, ka Dr. Ampareen ka la ong ba wat la ki seng saiñ pyrthei kiba don ha kylleng sawdong kin pyrshang ban pynkylla politik ïa kane ka mat CAA hynrei kum ki paidbah kim dei ban khih khuslai bad ki dei ban shaniah ha ka sorkar namar ba ka sorkar ka sngap ïa ka jingai jingmut jong ki paidbah babun balang.
“Nga kwah ban ai ïa ki nongshong shnong kawei ka jingpyntikna ba wat khuslai, ki seng saiñ pyrthei sawdong jong phi kin pyrshang ban pynkylla politik ïa kane. Nga ïohi ba ki don ki khynhun khynnah pule ruh kiba dik halor kane ka kam hynrei ki dei ban shaniah ba ka sorkar ka jong phi ka sngap ïa ki jingai jingmut jong phi”, la ong ka Dr. Ampareen.
Shuh shuh ka Dr. Ampareen ka la ong ba ïa ka CAA la dep ban mynjur ban pynlong aiñ naduh ki snem ba lah leit bad ki la pyntikna ruh ïa ki kyndon ban pyntreikam ïa ka hynrei mynta ka long ba ki hap ban thaw ïa ki komiti bad lyngba ka sorkar jylla kan peitngor ba kan nym shah ïa kum kita ki komiti ba kin wan ban ïuhroit ïa kata ka jingim jong ki nongshong shnong ka jylla.
Ka Dr. Ampareen ka la ong ruh ba kane ka dei ka por ba ka jylla ka donkam ban jied bad ban pynjop da ki MP kiba nud ban ïeng bad kren hapoh ka ïingdorbar ban ïada ïa ka Jaitbynriew na ka jingpyntreikam ïa kiba kum kine ki aiñ.
“Kane ka dei ka por jong ka jingdonkam ïa ki MP kiba nud ban ïeng ban kren ban ïada ïa ka Jaitbynriew, kane ka dei kata ka por ba ngin hap syntiat bad ka sorkar MDA-2.0 kaba kynthup lang ïa kiba bun ki seng saiñ pyrthei, ngin ïa ïeng kawei ban ïada ïa ka jylla na kata ka jingthmu kaba lah ban wanlam ïa ki jingma ha ka jylla ka jong ngi”, la bynrap ka Dr. Ampareen.
Ka la khot bad wer ïa baroh ki seng saiñ pyrthei ba kin ïadon ryngkat lang bad ka sorkar jylla ban ïada lang ïa ka Jaitbynriew na kaba pyntreikam ïa kum kine ki aiñ.
Ha kaba ïadei bad ka jingpynlong jingïakhih jong ka North East Student’s Organisation (NESO) ha kylleng ki jylla jong ka shatei lam-mihngi ka Ri ban pyrshah ïa ka CAA, ka Dr. Ampareen ka la ong ba ka sorkar ka la ïohi ïa ki dorkhas ba la phah da ki nongïalam jong ka NESO ha ki snem ba lah dep bad kum ka sorkar kan ïatreilang ryngkat bad ka NESO ban ïada ïa ka jylla kaba don ha tmier jong ka jingma.
“Ngi sngewthuh ba ka thaiñ hi baroh kawei ka don ha ka jingsyier bad ka NESO kaba lamkhmat ïa ka sur jong ki jylla ba don ryngkat lang ha ka thaiñ lam-mihngi, ngin trei ryngkat bad phi, ngin ïaid lang bad ngin ïakhana lang na ka bynta ka jingïada jong ngi kita ki jylla kiba don ha ka tmier jong ka jingma”, la bynrap ka Dr. Ampareen.
