London, Lber:
Ha kane ka khubor la ong ba katei ka longkmie ka la poi kha khun hapoh ka liengsuiñ katba katei ka liengsuiñ ka dang don ha shiteng suiñ bad ka leit jia ruh ha ka por ba katei ka liengsuiñ ka mih na Amman, jong ka Jordan ban leit sha ka Kad Liengsuiñ ha London.
Hynrei kaba donbok ka long ba u Dr.Hassan Khan, uba long u doktor ba ju dei khmih ha ka Basildon Hospital, u don hapoh jong katei ka liengsuiñ ha katei ka sngi.
La ong ba kitei ki nongtrei jong katei ka liengsuiñ ki la pyntip ha u ba kadon kawei ka briew kaba la shitom bad haba u leit peit u la shem ba katei ka briew ka la dei por kha bad ka bym long shuh ban ap ne pynslem haduh ban da poi sha hospital.
Kumta, utei u doktor um banse ban iarap kat ka buit- ka bor ba u don bad ka long ruh ka khubor kaba bha ba katei ka longkmie ka la lah ban kha-suk kha-saiñ khlem kino kino ki jingma ia ka jingim jongka ne ia i khun ba ka kha, ha kaba ka la ioh pdiang ia i khun kynthei iba shait ba khlaiñ halor suiñ katba ka liengsuiñ ka dang don ha shiteng lynti.
Kumta la ong ba katei ka liengsuiñ ka la leit hiar noh sha Brindisi Airport, kaba don sha ka phang South jong ka Italy khnang ba yn ioh ban pynkit ia katei ka longkmie 38 snem ha ryngkat ki khun jongka sha ka hospital kaba jan tam bad ban ioh ia ki jingsumar kiba biang.
Utei u doktor u la iathuh ba katei ka jingleit jong u ha katei ka sngi ka la lat por noh namar ba katei ka liengsuiñ ka la hap ban leit hiar shuwa sha Italy ha shiteng lynti hynrei u pynpaw pat ruh ia ka jingkmen kaba khraw ba u la lah ban pyllait im bad leh ia ka kam kaba bha naka bynta katei ka longkmie bad i khun jongka ha katei ka sngi.
