Shillong, Lber 13
Ka jinglong-jingman jong shongsuk shongshngaiñ ha nongbah Shillong khamtam hadien ka jingjia ba bthei u bom IED bad ka jingïoh kurup ïa ki tiar pynbthei da ki pulit ka Ri Bhoi district, ka la pynlong ïa ki bor pynïaid ilekshon ban kham peitngor bad khmih bniah ïa ka jingdonkam ïa ki pulit pahara khamtam ki Central Armed Police Force (CAPF) kiba ju pahara ha man la ki ilekshon.
Ka tyllong khubor ka ïathuh ba ka na ka liang ki bor ba dei khmih ki dang pynlong ka jinglum jingtip ïa ka jinglong-jingman ha ki konstitwensi bad ym pat lah ban ong katno pyrton ki pulit CAPF yn donkam ban phah sha Meghalaya.
Ki pulit ki dang pynlong ka jingkhmih bniah ban sngewthuh ïa ki jaka kiba donkam ban kham pynjur ka jingpahara ha kylleng khamtam ha ki district kiba hap hapoh ka Shillong Parliamentary konstitwensi namar la nang jia ki jingjia kiba lah ban pynthut ïa ka shongsuk shongshngaiñ.
La ong ba ka jingwan ki pulit CAPF kan shong ruh katkum ka jingpynbeit ka Election Commission of India ïa ki tarik thep vote ha ki Jylla bapher bapher khamtam ha ki Jylla ka thaiñ Shatei Lam Mihngi.
“Mynshwa ka ilekshon Lok Sabha ha ki Jylla ka thaiñ Shatei Lam Mihngi ka ju long kaba jai jai bad ïaid beit khlem da donkam ban pynlong ïa jingthep vote ha bun tylli ki wat. Hynrei ha kane ka ilekshon Lok Sabha 2024, ka jinglong-jingman ka la kham pher. Kum ha Manipur, ka jingpynlong ïa ka ilekshon ka lah ban kham pyrkhing namar ka jingumsnam kaba dang bteng bad yn kham donkam ruh bun pyrton ki pulit CAPF. Lada ka Meghalaya kan wan kham shakhmat ban thep vote lehse ngin ïoh shwa mangi ïa ki pulit CAPF bad ynda la dep na Meghalaya kin leit sa sha kiwei ki Jylla kum sha Manipur ne Tripura lada ka jingthep vote kam long ha kajuh ka sngi,” la pynpaw uwei na ki ophisar.
Kumta u la ong ba jingïoh ïa ki pulit CAPF kan shong eh katkum ka jingpynbeit ka ECI ïa ki tarik thep vote la kan buh lang ha kajuh ka sngi ïa ki Jylla ha thaiñ Shatei Lam Mihngi lane kan ïapher ka sngi thep ha kine ki Jylla.
Ka ilekshon Lok Sabha 2024 ban jied thymmai ïa ki dkhot ka Ïingdorbar Lok Sabha ka lah ban bteng ar bnai kumba ju long mynshwa, kata ha u Ïaïong bad Jymmang ban pyndep ïa ka jingthep vote bad jingñiew vote.
