Shillong, Lber 13
Ka ‘CM Elevate Conclave’ na bynta ki nongseng kam lajong jong ka Ri-lum Garo ka la long ha ka Sngi Balang ha District Auditorium, Tura ha ryngkat ka jingdonlang u Myntri Rangbah ka Jylla, u Conrad K. Sangma kum u kongsan.
Ha kane ka sngi, la ïadonlang ruh u Symbud Lamphang ka ïingdorbar thawaiñ ka Jylla, u Timothy D. Shira, Myntri ka tnad bording, u A.T. Mondol, Myntri ka tnad PHE, u Marcuise N. Marak bad MP ka Lok Sabha, ka Agatha K. Sangma.
Haba ai jingkren ha ka jingïalang, u Sangma u la ong ba kane ka dei ka jingïohi jngai bad ka thong jong ka Sorkar ban kynjoh ïa ka ïoh ka kot kaba 10 ‘billion dollar’ hapoh u 2028, ha kajuh ka por, ban pynïaryngkat ïa ka Jylla lem bad kiwei-kiwei ki Jylla ka ri kiba la kiew ha ka roi ka par.
“Lada ngim ïaid shakhmat bad kane ka thong, ngin ym lah ban kiew ne kynjoh ïa ka roi ka par kumjuh ha ka ïoh ka kot,” u la ong.
U Sangma u la bynrap ba ka ïoh ka kot kan sa kiew tang lada ki samla, kynthei, nongrep, nongseng kam lajong bad man la ki bynta jong ka imlang-sahlang ki ïadon bynta ha ka khana jong ka roi ka kiew.
U la ong ruh ba ha kane ka shisnem shiteng ba la dep, ka ïoh ka kot jong ka Jylla ka la kiew na ka 45 hajar klur sha ka 56 hajar klur bad ban jur halor ka jingdonkam na bynta ki jingbei tyngka kiba bha bad ka jingpynlut ka ban pynbha ïa ka ïoh ka kot.
Haba kren shaphang ka prokram ‘CM Elevate’, u Myntri Rangbah u la ïathuh ba ka long ka prokram kaba shit rhem jong ka Sorkar ban wanrah ïa ka rynsan kaba biang na bynta ki nongseng kam lajong ban kiew ban riewspah lyngba ka jingkyrshan pisa, ka roi ka par ha ka seng kam lajong bad ban wanrah ïa ki kam ki jam.
U la ong ruh ba hapoh jong ki skhim bapher-bapher jong ka prokram ‘CM Elevate’, ki nongïoh myntoi kin ïoh pdiang ïa ka ‘subsidy’ kaba 50% ne tam na ka jinglut jong ka projek.
Haba pyntip ba ka prokram ‘CM Elevate’ kan bteng man u snem, u la kyntu ïa ki samla ban shim kabu ïa ki jingmyntoi jong ka prokram.
“Ka ‘CM Elevate’ ka dei ka prokram ka ban ym pynsuk ïa ki kam ki jam jong phi, ki jingangnud bad ki jingphohsniew, hynrei kin ai lad ïa phi ban long ki nongai kam ha jaka ki nongwad kam,” u la bynrap.
U la kren ruh halor ka ‘Floriculture Mission’ kaba la plie dang shen da kaba bynrap ba kane ka prokram kan ai jingkyrshan ïa ka kam thung syntiew hapoh ka Jylla. U la ïathuh ruh ba ka IT Park ha Tura ïa kaba la dep ai ïa ka ‘work order’ – ban thaw ïa 5000 tylli ki kam na bynta ki samla ka Tura bad ki Ri-lum Garo baroh kawei.
Na ka liang u Mynri Rangbah u la sam ruh ïa ki shithi thung kam sha ki Village Data Volunteers (VDV).
Kumjuh, haba aiti ïa ka ‘Work Order’ na bynta ka ‘Bio-Mining’ jong ka ñiut ha jaka bret (ñiut) kaba ha Rongkhon Songital, Tura, u la ong ba ha ryngkat ka jingpynïeng ïa ka jaka bret ñiut katkum ka juk stad saïan, ka ñiut kaba 50,000 MT ha Rongkhon Songital yn sa lah ban pyndonkam biang.
U la ïathuh ruh ba ka projek kaba T. 4.5 klur hapoh 12-18 bnai yn sa lah pyndonkam biang ïa ka ñiut da kaba pynbha, kaba la buh jingeh shi kat dei na bynta ki nongshong shnong ka thaiñ.
Shuh shuh u Myntri Rangbah lem bad kiwei-kiwei ki la sam ïa ki ‘sanction letter’ sha ki nongïoh myntoi jong ki skhim ‘Agri-Response Vehicle’, ‘Agri-Warehouse’, ‘Common Facility Centre’, ‘Piggery’, ‘Poultry’ bad kam ri blang hapoh jong ka CM Elevate. Nalor kane, la sam ruh ïa ki ‘sanction letter’ hapoh jong ka ‘Floriculture Mission’.
