Shillong, Lber 13
Ki samla pule ha Tura Polytechnic ki la hap ban shu thied ïa ka um namar ka jingkyrduh um kaba la buh jingeh ïa ki ban pynbit pynbiang ha ki jingdonkam ban man ka sngi.
Ki samla pule kiba don ha ka lama jong ka Students Union Tura Polytechnic, West Garo Hills district ki la phah jingthoh sha u Principal bad kumjuh ruh sha u Deputy Commissioner ka West Garo Hills District.
Kane ka jingphah jingthoh sha kine ki bor ba halor ka dei namar ha kine ki shi bnai ba la kyrduh um ym don ba sngew ne sngap wat lada ki samla pule ki la rah da ki jingthoh pynrem ban pyrta ba ki kyrduh um ha kane ka jaka pule.
Katkum ka jingai jingtip ki samla pule kiba kham bun ki dei ki Khasi Jaiñtia, ki la ïathuh ba ki hap ban thied ka um ban pyndonkam ha jaka sah haduh `2000 ha 1000 liter hynrei haba la ïa bun ban pyndonkam ka dap tang lai sngi.
Ki la ïathuh ban sum bad saitjaiñ ki hap ban leit shabar ka jaka pule kaba ju pyndonkam ki paidbah. Kane kan ktah ïa ki samla pule ynda la long eksam namar kim lah shuh ban khreh kot haba ki jynjar ïa ka um.
Ki la ïathuh ba ka um ka poi tangba kam long ban pyndonkam.
