Nongstoiñ, Lber 13
Hadien ba ka Sorkar India ka la rai ban pyntreikam pura ïa ka aiñ Citizenship Amendment Bill kaba la pynskhem ïa ka kum ka Citizenship Amendment Act (CAA), ka Khasi Student Union (KSU) West Khasi Hills District Unit ha ka 13 tarik u Lber 2024 ka la mih shakhmat ban pynpaw ka jingpyrshah halor ka jingthmu ka Sorkar India.
Ha kane ka sngi, ka KSU ka la thang ruh ïa ki kyndon aiñ lane ki mat treikam jong ka CAA.
Ha shuwa kane, ka KSU ha ryngkat ki jingthoh ban pynpaw ïa ki jingpyrshah lyngba ki placard kiba la pynpaw ruh ïa ki kyntien ba ong, “Ngi donkam ïa ka ILP ym ïa ka CAA”, ka la pynlong ïa ka jingïalang pyrshah bad ban pynsngewthuh paidbah halor kane ka aiñ hajan ka jingkieng Nonbah ha sor Nongstoiñ.
U samla John F Nongsiang, President ka KSU West Khasi Hills District Unit haba kren ha ka jingïalang, u la pynpaw sha ki paidbah ba kane ka mat kam dei jong ki seng lane tang jong ka KSU hynrei ka dei ka mat na ka bynta ka ïap ka im jong ka jaidbynriew, namar lada kum ki paidbah kim kyndit bynriew mynta lano pat, namar lada ym ïohi jngai, kan sa don ka por wat ki khun ki ksiew ruh kin sa duh ïa ki kam ki jam, kin duh wat ban leit sha ki ïingmane.
Shuh shuh u la kynthoh ruh halor ka jingkren u Myntri Rangbah ban ong ba ka CAA kan nym treikam hapoh ka Jylla Meghalaya, hooid mynta kan nym treikam hynrei ha kawei ka por kan sa treikam kumba long ïa kiwei kiwei ki aiñ. Kumba long ïa ka Khyrnit Hynriew, ka sorkar India ha kawei ka sngi kan sa pynduh namar ngin long tang ki rit paid hapoh ka Ri India. Namar kata, kum ki paidbah dei ban kynmaw ba kine ki kyntien jong ki nongïalam saiñ pyrthei ka dei tang ka jingpynbiej tang ban ïoh thied ïa ka vote bad ban pynsngewthuh bakla.
Kumta u la ong kum ki samla ki dei ban tip ba kine kiei-kiei ha kawei ka sngi ka jaidbynrew kan sa shah tyllep noh ha ki briew kiba nabar ki ban wan buhai shnong hapoh ka Jylla.
U Samla Franklin Syiemïong, General Secretary ka KSU West Khasi Hills District u la ong, mynshwa ka sor Shillong mynba ka dang dei kawei na ki nongbah jong Assam, ki bar jylla ki dei tang ki nongwan kai bad wan donkam hynrei mynta ki la long trai bad bat ruh ïa u lakam synshar ha ka khaïi-pateng.
U la ong, “Lada ïa kane ka CAA ngin shu long tang ki nongpeitkai, ngin shu long tang ki ñiang kohnguh jongno-re-jongno kiba don ha ka bor, nga sngew ban ong ba wat ka Nongstoiñ kan sa long kum ka nongbah Shillong ha kawei ka sngi”.
Shuh shuh u la ong ruh ba naduh ki snem kiba mynshuwa ka KSU bad ka jaidbynriew ka dawa ïa ka ILP ka ban long ka aiñ ka ban ïada kyrpang ïa ka jaidbynriew hynrei ka jubab aïu ba ïoh. Kumta lada ka ktien kam treikam dei ban ai jingsneng, dei ka kam ka ban pyntip briew pat. Namar kata, ka KSU bad ki dkhot jong ka, ki long kiba la pynkhreh bad ban ïeng la ka long ba yn mih ha surok ban ïaleh ne la ka long da kano-kano ka rukom ban im ka Ri.
