Los Angeles:
U Adam Sandler, Margot Robbie bad Tom Cruise ki la shah nam kum ki khlur ak phlim ba ioh ia ka jingsiew kaba heh. Kane ka long katkum ka jingwad jingtip jong ka Forbes ha u 2023.
U Adam u la bat ia ka kyrdan kaba ha khlieh duh katkum ka Forbes halor ka jingsiew kaba u la ioh bud sa ka Margot Robbie ha ka kyrdan ba-ar bad u Tom Cruise balai.
Ha u snem ba la leit u Adam u la kamai haduh $73 tang na ka jingsiew kaba u ioh na ki phlim kiba u la shim bynta kiba kynthup ka ‘Murder Mystery 2’, ‘You Are So Not Invited to My Bat Mitzvah’ bad ‘Leo’.
Ha kajuh ka por une u tyngshop uba la pynmih ruh ia ka ‘The Out-Laws’, kaba la shim bynta da ka Nina Dobrev, Ellen Barkin bad Pierce Brosnan, u la iohnong ruh na kane ka phlim na ka daw ba ka iaid bha, bad ka jinglah ban khring ia ki nongpeitkai.
Kane ka dei ka sien ba-ar na ka bynta u Adam ban bat ia ka kyrdan kaba nyng kong ha ka Forbes halor ka jingsiew kaba u la ioh ha kaba ka sien nyngkong ka long ha u 2002 ha kaba kane ka long ruh namar ka jing-iaid bha jong ka ‘Mr Deeds’ bad ‘Punch-Drunk Love’.
Ka Margot Robbie pat ka la ioh ban rung ha ka kyrdan kaba ar na ka bynta ka jingsiew ba ka ioh ha ka phlim Barbie kaba long haduh $59 million.
U Tom Cruise pat ula kamai kumba $45 million ha u 2023 bad kane ka long na ka bynta ka phlim kaba ula shim bynta ka ‘Mission: Impossible – Dead Reckoning Part One’ kaba la ak lang ruh da ka Hayley Atwell, Rebecca Ferguson bad Vanessa Kirby.
Ha ka kyrdan basaw la bat da u Ryan Gosling bad Matt Damon ha kaba baroh arngut kila kamai kumba $43 million na ka bynta ka Barbie bad Oppenheimer.
Ka puron Jennifer Aniston pat ka la kamai haduh $42 million ha u 2023 bud sa u Leonardo DiCaprio bad Jason Statham ha ka kyrdan kaba 7 kiba la ioh kumba $41 million.
Ha ka kyrdan kaba 9 la ioh bat da u Ben Affleck bad kumjuh ruh ha ka kyrdan ba 10 da u Denzel Washington.
