Shillong, Lber 13
U Chief Executive Member (CEM) ka Khasi Hills Autonomous District Council (KHADC) u Bah Pynïaid Sing Syiem, u la kyntu ïa ki samla ba kim dei ban ieid jaidbynriew tang ha ki rynsan ‘Social Media’ hynrei ban mih sha madan ban ïakhun ïa ki kam khaïi.
U CEM u la ong ïa kane haba jubab halor ka ‘motion’ kaba la wanrah da u Nongïalam ka Liang Pyrshah ha ïingdorbar KHADC u Bah Titosstarwell Chyne ha ka dorbar mang tyngka.
U Bah Pynïaid u la ong, ki la don kiba ong ba balei hap hiar khynra laisen khaïi da u CEM bad EM? Hynrei kum ki nongïalam ne u CEM bad ki EM ki hiar sha madan ban khynra laisen khaïi ka long ban sngewthuh bad tip ïa ka jinglong-jingman bad ïohi ïa ki jingeh ki nongkhaïi trai jylla.
U CEM u la ong ha ka jinghiar khynra laisen khaïi ha Them Raid Marwet ne Khanapara, kaba sngewsih ka long ba ki don tang 19 tylli ki ïing jong ki Khasi bad da ki spah tylli ki dukan bad kam khaïi la trei da ki bar jylla.
“Nga kyntu ïa ki samla jong ngi, namar teng-teng sngewkhia ban pynpaw ba ki don katto-katne ki samla kiba la trei bha hynrei kiba bun ki nang tang ban kynthoh kynnoh, khamtam kito kiba sdang ban wohdaw-wohdong ha ki rynsan ‘Social Media’,” la ong u Bah Pynïaid.
“Nga sngew ban ong sngewbha ïa kum kine ki samla ba ïa ieid jaidbynriew tang ha ki ‘social media’, sngewbha mih sha madan, leit knieh ïa kine ki jaka khaïi,” la ong u CEM bad bynrap “Na ka liang ka Council ngin lah ban pynsangeh ïa ka laisen khaïi, lada phi ki samla phi shlur ban hiar sha khappud ban trei ban ktah bad khaïi-pateng, hynrei sngewsih ki heh nia tang ha ki rynsan ‘social media’ ban leit knieh ban seng kam seng jam kim nud.”
U CEM u la pyntip ruh ba ha u snem 2016, ka sorkar u Dr Mukul, ka la pynmih kawei ka byrta na tnat DCA ba ka laisen khaïi yn nym donkam ban ïoh shwa na ka Council ha ki ‘tender’ ba heh bad ki kompeni ki lah ban ïashim bynta ha ki ‘tender’ lyngba ka ‘online’ bad ynda la ïoh ka kam, sa leit pan laisen khaïi. U la ong ba kane ka kam ka long shisha kaba sngewkhia bha bad na ka liang ka Executive Committee ka Council ka dang buddien ïa kane ka kam bad la ïakynduh ïa u Myntri Rangbah bad Myntri ka tnat DCA ban kyntu pyndam noh ïa kane ka byrta, namar ka long ka jingkhang ba plie ban ailad ïa ki kompeni ba heh ban rung bad bsuh khlieh hapoh ka jylla.
