Kam long kaei-kaei kaba lyngngoh ba ka Harijan Panchayat Committee (HPC) kan kyrpad ïa u Myntri ka tnad Pohïing ka Sorkar Pdeng, u Amit Shah ban tuklar mardor halor ka jingbthei bom IED ha Them Ïew Mawlong. Ka HPC ha kajuh ka por, ka la kyrpad ïa u Shah ban shimkhia ïa ka mat kaba ïadei bad kiba shong ba sah ha Them Ïew Mawlong ne Them Metor da kaba kynthup lang ïa ki lai mamla ha ryngkat ka sorkar jylla. Haba kynthoh halor ka jingbthei bom ha 9 tarik Lber, u nongïalam ka HPC, u Gurjit Singh, u la ong ha u Shah ba ki briew na ka jaitbynriew Sikh ha Them Ïew Mawlong ki la mad ïa ki jingshah byrngem na ki kynhun trai-ri bapher-bapher lyngba ki lad pathai khubor na ka por sha ka por naduh ba jia ha ka jingthombor ha u 2018.
Watla ki jingïakren hapdeng ka sorkar jylla bad ka HPC ki la ïaid naduh u snem 2018 hadien ka jingïakynad kaba jur ha kato ka por, hynrei haduh mynta, ym pat lah ban pynkynriah ïa ki sha ka shlem treikam barim ka Shillong Municipal Board. U Gurjit ruh u la kdew ba wat hapdeng kiba bun ki jingïalang bad ki jingïamir jingmut, ym shym la ïohi ïa kino-kino ki kam, bad wat ki jingkular ban tuklar na ka liang ka Sorkar India, kaba la pynsngew hashwa, kim pat shym la urlong. Ha ka jingshisha, ka Sorkar Pdeng kam dei ban tuklar ha kaba ïadei bad kane ka mat namar ka long ka kam pohïing jong ka Meghalaya. Ngi la ïohi ba ki jingïakren bad jingïapynbeit ki la ïaid bad ap sa tang ban pynkynriah ïa ki nongshong shnong na Them Metor. Kam bha lada ka Sorkar Pdeng ka wan tuklar ha kane ka khyllipmat namar ka lah ban ym wanrah ïa ka jingseisoh. Ha ka jingshisha, ka Sorkar Pdeng ka dei ban ieh beit ïa kane ka mat ha ka sorkar Meghalaya ba kan leh ïa kaba donkam. Lada sdang tuklar ka Sorkar Pdeng, kan long kum ka nuksa ka basniew bad kan sa pynshlur ïa ka ba kan mushlia sa ha kiwei pat ki mat ki jura kiba dei jong ka jylla.
Hynrei, lada ka Sorkar Pdeng ka sngewbit, ka dei ban aiti ha ka National Investigation Agency (NIA) ba kan tohkit halor katei ka jingjia bthei bom ha ka 9 tarik Lber. Tangba ngi ïohi ruh ba ki pulit ka jylla ki la dep ban ïoh kem ïa ki katto katne kiba la shah kynnoh donkti ha katei ka jingjia. Kan shong sa ha ka jingtohkit shano kan ïalam bad mano shuh kiba donkti nalor kiba la dep ban shah kem. Ngi kynmaw ba ka NIA ka la tohkit hi ha kaba ïadei bad ka jingbthei bom ha ka jaka sah ki nongtrei ka Star Cement ha Lumshnong bad ka la dep ruh ban ai ïa ka jingmudui sha ïingbishar pyrshah ïa ki saw ngut ba kynthup ïa ki nongïalam ka seng Hynñiewtrep National Liberation Council (HNLC) naduh u snem 2022. Lehse ka NIA kan kham lah ban ngam jylliew ha kaba ïadei bad kiba kum kine ki jingjia bad ban thwet shuh ïa kito kiba kwah ban pynshong syier ïa ka jylla bad ki nongshong shnong.
Ha kaba ïadei biang bad ka jingphah tuklar ka HPC ïa u Amit Shah, ngi sngewdei ban kyntu ïa ka sorkar jylla ba kam dei satia ban ailad ba nangthie na Delhi kin wan ban mushlia halor ka jingpynkynriah ïa kiba shong ba sah ha Them Metor. Ka sorkar jylla ka la dep ban shim ïa ka rai ban pynkynriah, bad ka dei ban neh kumta. Ym tang katta, ka dei ruh ban pynthikna ba ka jingpynkynriah kan urlong shisha bad kam dei ban kut tang ha ka jingpynbna lyngba ki lad pathai khubor. Ka sorkar jylla ka don ka iktiar halade ban rai ïa kiba kum kine ki mat, bad ym lah ban ailad da kiwei pat ba kin rai. Ha kajuh ka por, ka sorkar jylla ka dei ban bthah ïa ka tnat pulit ba kan kham long peitngor bad ban pynkhlaiñ ïa ka jingsyntiat khnang ban khanglad ïa kino-kino kiba kwah ban buh jingma ïa ka jingim jong kiwei. Ka dei ka kamram bad jingkitkhlieh jong ka sorkar jylla ban teh lakam ïa ka shongsuk shongsaiñ hashwa ba kiei-kiei kin nang sniew. Lada kan nang sniew, ka Sorkar Pdeng kan ïoh daw ban tuklar ha ki rukom bapher-bapher.
Ha kajuh ka por, ngi sngewdei ban kyntu ïa ki para nongshong shnong ba kin pynneh ïa ka shongsuk shongsaiñ bad ym ban leh ïa kino-kino ki kam ki ban buh jingma ïalade bad ïa kiwei ruh kumjuh khamtam eh ïa ki briew kiba lui-lui. Ha ka jingïakhun hapdeng ki hati, kiba ïap ei ki dei ki phlang. Ngim dei ban ailad ïa kaba kum kane namar ngi la dep ban mad ïa ki sngi kiba dum ha ki por kiba mynshwa. Kiba la dep ban mad, ki la sngewthuh. Ki bym pat mad, kim dei ban pan kwah. Ngi dei ban ieid ïa ka jingsuk namar kan long ka jingmyntoi lang ïa baroh ha ki liang bapher-bapher. Lada ngi isih ïa ka jingsuk bad ngi kwah ïa ki kam ïaumsnam, ngi pan kwah ïa ki jingsniew kiba bun rukom kiba ngin sa babe ha kawei ka sngi ynda ka por ka la dier.
