New Delhi, Lber:
Kum ka jingai jubab halor ka jingkynthoh jong u Myntri Rangbah jong ka Delhi u Arvind Kejriwal ha kaba ïadei bad ka jingpyntreikam ïa ka Citizenship Amendment Act (CAA), u Myntri jong ka sorkar kmie uba dei khmih ïa ka tnat ki kam pohïing u Amit Shah u la ong ba u heh nongïalam jong ka seng Aam Aadmi Party (AAP) u la sngewkutlad halor ka jingshah kynnoh donkti jong ka seng jong u ha ka kam bamsap bad ong ba lada u sngewkhia halor ka jingshngaiñ hapoh ka ri u la dei ban kren shwa shaphang ka jingwan rungtuh jong ki nong Bangladesh.
Kane ka jingkren jong u Shah ka la long hadien ba u Kejriwal ha ka Lah Sngi U Blei u la kynthoh jur ïa ka sorkar BJP ba la lamkhmat da u Narendra Modi halor ka jingpyntreikam pura ïa ka Citizenship Amendment Act (CAA), ha kaba la pynshisha ba kin sa pynjaboh ïa ka kam saiñ pyrthei tang kumno ban ïoh jingkyrshan na ki vote jong ki briew baduk na ki ri ba marjan.
Ha ka rynsan phah khubor ha ka X, u Kejriwal u la ong, “Hadien ba la dep ban synshar ïa ka ri da kumba 10 snem, ka sorkar jong u Modi ka la wanrah da ka CAA hashwa ban pynlong ïa ka ilekshon ban wan. Ha ka por ba ki briew ki baduk bad ki kynhun ba shu biang briew ki la ïakynduh jingeh na ka jingkiewdor bad ka jingdon jong ki samla ba khlem kam khlem jam, ha ka jaka ban weng ïa ki jingeh kiba bun, ki la wanrah pynban da ka CAA.”
U la ong ba ka BJP ka la pynjaboh ïa ka synshar-khaddar tang kumno ban ïoh vote na ki nongshong shnong jong ki ri ba marjan.
U la ong shuh shuh ba kane ka la paw shai ba ka dei tang ka jingthmu myntoi ha ka kam saiñ pyrthei khamtam haba ka ilekshon Lok Sabha ka la jan bad kumjuh kane ka paw shai ba ka sorkar BJP ka la phai khmat sha kine ki ritpaid tang kumno ban ïoh jingkyrshan ha ki jingïakhun ïa ki ilekshon.
Kumba la sakhi, la ong ba ki ritpaid na lai tylli ki rib a marjan kin sa ïoh ïa ki syrnod jong ka jinglong trai ri.
Kane ka mut ba ki kwah ban wanrah ïa ki briew kiba na ki rib a marjan bad ka India ba kin shong kin sah ha kane ka ri bad ban pynsah ïa ki.
“Ki briew khamtam jong ka Assam bad jong baroh kawei ka jylla ba shaphang Shatei-lam-Mihngi jong ka India ki la pynpaw ka jingpyrshah jur halor kane, kiba long ki lanot jong ka jingphet shnong na from Bangladesh bad kito kiba sngewthuh ba ka ktien bad ka kolshor jong ki ka don hapdeng ka jingma. Ka seng BJP ka la shet kylla ïa ki briew jong ka Assam bad jong ki jylla ba don ha ka bynta ba shaphang Shatei-Lam-Mihngi,” u la ong.
Ki briew kin sa ai jubab halor kane ka jing-leh ka sorkar ha ka ilekshon Lok Sabha, la ong u Kejriwal.
