Shillong, Lber 14
San sngi hadien ka jingbthei bom IED ha Them Metor, ka Hynñiewtrep National Liberation Council (HNLC) ha ka Sngi Palei ka la shim jingkitkhlieh halor kane ka jingjia bad ka la pynbna ruh ba dei ka ‘Budnar Shadow Squad’ (BSS), kaba treikam kum kata ka ‘Special Force’ jong ka HNLC, kaba la pynbthei bom.
Ïa kane, la pyntip da u General Secretary & Publicity Secretary ka HNLC, u Bah Saiñkupar Nongtraw, ha u kyrwoh khubor ba la phah mynta ka sngi.
“Ngi shim jingkitkhlieh halor ka jingpynbthei bom IED ha Them Metor ha ka miet jong ka 9 tarik Lber. Ka Budnar Shadow Squad, kaba treikam kum ka ‘Special Force’ jong ka HNLC, ka la don bynta ha kane ka jingpynbthei bom. Ka sorkar MDA bad ka tnat pulit ki la kyndit ban tip ba ka kynhun jong ngi ka la lah ban leh ïa katei ka kam ha ka jaka ba bun ki bor pahara,” la ong u Bah Saiñkupar.
Hynrei u la ong ba ka seng ka khlem kwah ban pynmynsaw ïa ki ‘riew paidbah ne ki briew ba lui-lui, bad namarkata, ka seng ka la tyngkan ïalade.
Ha kajuh ka por, u la ong ba ka long kaba donkam ïa ka sorkar ba kan weng noh ïa ki pulit CRPF na Them Metor khnang ba ki paidbah ka Hynñiewtrep kin lah ban ïaid ban ïeng laitluid.
Nalorkata, u Bah Saiñkupar u la ong ba namar ka jingslem jong ka sorkar Meghalaya ban pynkynriah ïa ki Harijan kiba sah ha Them Metor, ka HNLC kam banse ban leh ïa katei ka kam pynbthei bom.
“Kane ka long ka jingpynkynmaw ba jai-jai ba lada ka sorkar ka pulom ban ïada ïa ka jaitbynriew jong ngi, ngi lah ban ïohi ba kan mih ka thma (Civil War) ha Hynñiewtrep. Kano-kano ka kynhun/jaitbynriew kaba buh jingma ïa ka jaitbynriew Hynñiewtrep, kan sa shah leh da kaba tyngeh. Ka sorkar ka dei ban pynkynriah ïa ki Harijan hapoh shi bnai lane kan hap mad kiei-kiei ki bym sngewtynnad,” la ong ka HNLC.
Shuh shuh u Bah Saiñkupar u la ong ba ki pulit ki don hapdeng ka thma bad ka jaitbynriew, bad ba ka HNLC kan ïada ïa ka khyndew ka shyiap bad ki paidbah da kino-kino ki lad ki lynti ba donkam.
“Haba ngi ïakhun na ka bynta ka daw bah na ka bynta ka Jaitbynriew, kynmaw ba ngim don eiei ban duh. Ka tnat pulit ka shah pynïaid ha u bar jylla, bad ki pulit Khasi ki la shah kheiñ kum ki ksew ba beh thong. Haba u pulit bar jylla u ong wiar, ki hap wiar; haba u ong dait, ki hap ban dait. Ynda u ong pynjaw snam, ki pynjaw snam na ka bynta ki bar jylla. Hynrei haba wan ban ïada pat ïa ki dkhot ka jaitbynriew Hynñiewtrep kiba shah ban beiñ ha ki bar jylla, ki pulit kim don bniat lane ka snam ban pynjaw,” u la bynrap.
Ha kajuh ka por, u Bah Saiñkupar u la ong ba ka HNLC kam bthah ïa ki Harijan ba kin mih noh na ka khyndew ka shyiap Hynñiewtrep, bad kam don jingthmu ban wanrah ïa ka jingïapait ïapra ne ka jingïasih. U la ong ba ka HNLC ka ai mynsiem ïa ki Harijan ba kin kynriah sha kawei pat ka jaka ba la ai da ka sorkar bad kin mih noh da kaba suk na Them Metor.
U la pynkynmaw ruh ba ha ki snem ba mynshwa, ka HNLC ka shim ïa ka jingim jong u Lal Singh namar ki kam runar ki jong u kiba la ktah ïa ka jingsngew jong ka jaitbynriew.
U Bah Saiñkupar u la ong ruh ka khubor sha ki bar jylla kiba sah ha ka khyndew ka shyiap Hynñiewtrep, da kaba ong, “Ngi pdiang ba phin wan sah hangne, hynrei kiar na ka jingkam trai halor ka khyndew ka shyiap, ban pyni bor, ban ïakhun bad ngi lane ban pynshit ïa ngi. Lada ym lah ban leh kumta, kin sa mih kiei-kiei ki bym sngewtynnad namar u nongtuh da lei-lei ruh um lah ban long u trai.
