Shillong, Lber 14
Ka East Khasi Hills Cricket Association (EKHCA) kan pynlong ïa ka Inter School Cricket Tournament na ka bynta ka (L) Benjamin Diengdoh Under-15 Boys bad ka Under-17 Girls naduh ka taïew ba-ar u Ïaïong mynta u snem ha Shortimai Syiem Stadium, Smit.
Ki skul kiba kwah ban ïashim bynta ki lah ban wad jingtip na ki dkhot nongkitkam katei ka synjuk bad ka tarik kaba khatduh ban ai kyrteng kan long ha ka 28 tarik mynta u bnai. Ki skul kiba lah ban ïashim bynta ki dei kiba hap hapoh ka East Khasi Hills lait noh ïa kiba hapoh ka nongbah Shillong. Ïa ki jingtip ba bniah ki lah ban ïakynduh ia u Bah Aaron Diengdoh (8787715454), Aris Suting (8974281047), Langson Thawmuit (8787635040) bad Bah D.M.Marbaniang (9863024837).
