Shillong, Lber 14
Ka Meghalaya Pradesh Youth Congress (MPYC) bad Mahila Congress ha ka Sngi Palei ki la pynlong da ka jingïakhih ba jai-jai ha nongbah Shillong ban pynpaw jingpyrshah ïa ka jingpyntreikam ka Sorkar Kmie hapoh ka jingïalam ka BJP ïa ka Citizenship Amendment Act (CAA).
Ha kane ka sngi la ïohi ruh ba ki samla jong ka seng Congress kata ka MPYC hapoh ka jingïalam u President u samla Adrian Chyne Mylliem ki la leit ban pynpaw ïa kane ka jingpyrshah hakhmat ka shlem treikam jong ka Bharatiya Janata Party (BJP) Meghalaya.
Ha kane ka jingleit ïakhih hakhmat ka shlem treikam ka BJP, ki samla ka seng Congress ki la rah ruh ryngkat bad ki placard ban pynpaw ïa ka jingpyrshah ïa ka Sorkar Kmie ba ïalam da ka BJP kaba la ïaid shakhmat ban treikam ïa ka aiñ CAA hapoh ka Ri India.
U Vice President ka MPYC u samla Banphira Basaïawmoit haba kren sha ki lad pathai khubor u la ong, “Wat la ïa ki jaka ba hap hapoh ka Khyrnit Hynriew la pyllait na ka CAA hynrei lada ki nong Bangladesh ki la kylla long ki nong India, ka aiñ aïu ka ban khanglad ïa ki ban wan sha Meghalaya”.
U Banphira u la ong ba ka riti synshar ka Ri India ka shah ïa ki nongshong shnong ban sah ha kano-kano ka Jylla bad lada ki nong Bangladesh kiba ïoh long nong India lyngba ka CAA, kan nym don aiñ ban khang ïa ki ba kin wan sha Meghalaya, ha kata ka por mano ban shim ka jingkitkhlieh.
“Ngi pyrshah bad ngi dawa ba dei ban pyndam noh shi syndon ïa ka CAA ha baroh ka Ri India,” u la ong bad bynrap ba ka Meghalaya ka la jyllei lypa da ki bar jylla bad ka jingkam ba ka Meghalaya ka lait na ka CAA ka dei tang ka jingpynthame ïa ki briew.
Ha kane ka sngi, la ïohi ruh ba na ka liang ki dkhot jong ka Mahila Congress ki la pynlong ka jingïakhih da kaba ïalum lang ha Khyndai Lad, ha kaba ki la rah placard bad pyrta slogan ban pynrem ïa ka Sorkar Kmie halor ka jingïaid shakhmat ban pyntreikam ïa ka CAA.
