Shillong, Lber 14
Ka Sorkar Jylla ka la ïateh lok bad ka North East United FC na ka bynta ban seng ïa ka shlem ai jinghikai phutbol ha ka nongbah Shillong. Kane kan dei ruh ka sien nyngkong ha ka thaiñ shatei lammihngi ban wan seng da kane ka kynhun ïalehkai Indian Super League (ISL).
Kane ka la wan hadien ba Ka Sorkar Jylla ka la aiti da ka shithi sha u khlur ak phlim Bollywood u John Abraham bad uba long trai ïa ka NorthEast United Football Club, ha ka jingïalang sam baibam (scholarship) sha ki nongïalehkai ka Jylla bad ruh sha ki samla kiba don ïa ki sap ha la ki jong ki prokram bapher bapher kaba la long ha ka Sngi Palei ha Conference Hall jong ka skulbah NEHU, Shillong.
Kane ka shlem ai jinghikai ka dei ruh ka bynta jong ka Sorkar Jylla ban kyntiew bad saiñdur ha ka kam ïalehkai phutbol naduh ki khynnah kiba dangrit.
Na ka liang u Myntri Rangbah ka Jylla u Conrad K. Sangma u la pynpaw ka jingsngewkmen ban ïadon bynta bad kane ka klob kaba paw jong ka thaiñ shatei lammihngi. “Kane ka shlem ai jinghikai ka long ban ai jinghikai ïa ki khynnah ïalehkai ka Jylla jong ngi khnang ba kine ki khynnah ynda ki la san ha ka kam ïalehkai phutbol kin lah ban paw hapoh ka ri hi baroh kawei.”
“Te kumta ngi ai khublei ïa u John Abraham lem bad ka kynhun jong u kiba la kloi ban noh synñiang na ka bynta ban kyntiew bad ban saiñdur ïa ki khynnah ïalehkai ka Jylla jong ngi.”
Ha kawei pat liang u John Abraham u la pynpaw ba kane ka long ka sien kaba nyngkong eh ha ka thaiñ shatei lammihngi ban wan seng ïa ka shlem ai jinghikai ha ka nongbah Shillong. “Ngi kwah ba ki khynnah kiba shah hikai hapoh kane ka shlem ai jinghikai kin ïoh ban mihkhmat ïa ka NEUFC bad shen ngin sa sdang noh .”
“Wat la nga long uba ju sngewtynnad ha kiba bun ki jingïalehkai kum ka jingkilanmet, ka ñiah saikil bad kiwei. Ngi kyrmen ba ngin sa lah ban pynurlong ïa baroh, hynrei ngin sdang shwa da ka shlem ai jinghikai phutbol namar ka dei kaba nga ju sngewtynnad eh,” u la bynrap.
