Shillong, Lber 14
U Myntri Rangbah ka jylla, Conrad K Sangma, ha ka Sngi Palei u la pynkup burom bad ai jingithuh ïa ki nongrwai kiba la don ha ka kam rwai mynta la palat 15 snem ha ka jingïalang jong ka Meghalaya Grassroots Music Project, Season 2 ha Marriot Shillong.
Ha kane ka jingïalang la ïadon lang u tyngshop ba paw jong ka Bollywood u John Abraham.
Haba kren ha ka jingïalang, u Conrad u la pynkynmaw ïa ki por kiba u sngewtynnad bha ïa ka tem ka put ha ka jinglong samla bad kitei ki dei ki sngi kiba u don ïa ka jingangnud, ka jingïakhun bad ka jingphohsniew kiba la buh ïa ka jingkynmaw ha ka jingmut jingpyrkhat jong u.
“Man la ka por, haba nga mut ban thaw ïa ki kpait saiñ kam, nga ju kyrtiang dien ïa kito ki sngi bad nga pyrshang ban ai ïa ki samla kiba mynta ïa ka rynsan, jingkyrshan bad jingbtin lynti ïa kaba ngim shym la ïoh ha ka por ka jong ngi,” la ong u Conrad.
U Myntri Rangbah u la ong ba ka MGMP ka dei kawei na ki prokram kaba la ai ïa ka jinghun namar ka la wanrah ïa ka jingkylla ha ka jingim jong ki nongrwai bad ki nongtem bad ki samla ïa kaba lah ban sakhi.
U la ong ba ka tem ka put mynta ka la ïapher bad ki por kiba mynshwa namar mynta ki la don ki teknoloji bad ka rynsan ban ïoh jinghikai ha ka rwai bad ka tem ka put.
“Nga kwah ba ki nongrwai bad ki nongtem kiba dang khynnah ba kin shim ïa ka jingïarap jong ki kor teknoloji bad ban rah sha kawei pat ka kyrdan ïa ka rwai bad ïa ka tem ka put ka jong ki,” u la ong.
“Ka MGMP ka ailad ruh ïa ki samla ba kin ïoh ïa ka rynsan bad ïa ka jinghikai bad ka jingtip ban pule bad ban thoh ïa ki jingrwai, khnang ba ka thong ka jong ngi kan long kaba lah ban leh kum ha ki rynsan kiba heh ha ka pyrthei,” u la ong.
U Myntri Rangbah u la kular ban pynïoh ïa ka Ibanez Guitar ha uwei u nongtem uba don jingduna ha ka dkhot met uba la pyni ïa la ka sap ka phong ha katei ka jingïalang.
U John Abraham ha ka jingkren u la ong, kaei kaba ka sorkar jylla ka la leh ban ai ka rynsan ïa ki nongïalehkai bad ki nongrwai bad ki nongtem bad ïa ki samla ka long kaba biang bha.
U John u la ong kum ki samla ki dei ban bteng ban pynim ïa la ka jingangnud bad sngewthuh ba phi long kiba donbok bha namar ba ha ki por jong ki, kim shim la ïoh satia ïa kum kane ka jingkyrshan bad jingbtin lynti.
Ki nongrwai kiba la shah pynkup burom ha u Myntri Rangbah ki long u Tengnang Sangma, Gracyl Ropmay, Starly Shullai, Felix Langstieh, Cinda Sangma, Amabel Susngi bad Desmond Rimaki Sunn. Ha kane ka sngi la pyllait paidbah ruh ïa kawei ka kot kaba la tip kum “The Songs of Our People,” kaba la thoh da u Anurag Banerjee.
Ka MGMP Season 2 naduh ba la sdang ïa ka ha ka 4 tarik u Risaw 2023, la pynlong 730 ki prokram ha kylleng ka jylla kaba la wan ban ïashim bynta da palat 1000 ngut ki nongrwai bad nongtem. Ka jingïoh kamai ki nongrwai bad nongtem ka la kiew na ka 10,000 sha ka 12,000 ha kawei ka prokram jong ka Season 2.
