Shillong, Lber 14
Ka Nongdawah bad ka Cricket Lovers CC ki la ïoh jingjop ha ka lympung ïalehkai 3rd District League T20 Cricket Tournament 2023 ba la pynïaid da ka East Khasi Hills Cricket Association.
Ha kane ka jingïakhun kaba la long ha ka Sngi Palei ha Balang ha madan Shortimai Syiem Stadium Smit, ka Nongdawah ka la pynliem noh ïa ka Maw-ryngkneng CC da 68 run. Ka Nongdawah ka la tied 140 run bad shah pynhap 9 wiket ha ki 20 over. U Marremdor Kharsati u la tied 17 run na ki 31 bol. Katba u Bahrang Lawai u la shim 4 wiket.
Haba wan beh ïa ka thong, ka Mawryngkneng ka la ïoh tang 72 run na ki 10 wiket ha ki 17.3 over. U Ruston Lamare u la tied 20 run na ki 14 bol. Katba u Kyrmenskhem Nongpluh u la shim 3 wiket. Ïa ka nam Player of the Match la khur da u Kyrmenskhem Nongpluh.
Haba phai sha kawei pat ka jingïakhun kaba ar, ka Cricket Lovers CC ka la jop da 20 run ïa ka Sohra Combine CC. Ka Cricket Lovers kaba la kam trai ban tied nyngkong, ka la ïoh 147 run bad shah pynhap 6 wiket ha ki 20 over. U Winningstar Khongjoh u la tied 51 run na ki 45 bol. Katba u Mangkara Diengdoh u la shim 2 wiket.
Haba wan beh ïa ka thong, ka Sohra Combine ka la ïoh tang 127 run na ki 8 wiket ha ki 20 over. U Mangkara Diengdoh u la tied 29 run na ki 22 bol. Katba u Prem Lama u la shim 2 wiket. Ïa ka nam Player of the Match la khur da u Winningstar Khongjoh.
Haba phai sha ki jingïalehkai kiba la long ha ka Sngi Balang, ka Smit ka la pynliem noh ïa ka Thangsning CC da 9 wiket. Ka Thangsning kaba la kam trei ban tied nyngkong, ka la ïoh 57 run bad shah pynhap 10 wiket ha ki 18.4 over. Haba wan shimti ïa ka pali kaba ar, ka Smit ka la kynjoh sha ka thong da kaba ïoh 61 run bad shah pynhap 1 wiket ha ki 5.4 over.
Ha kawei pat ka jingïakhun kaba ar, ka Lumpaia Avengers ka la jop da 118 run ïa ka Marbisu CC. Ka Lumpaia Avengers kaba la tied nyngkong ka la ïoh 181 run bad shah pynhap 6 wiket ha ki 20 over. Haba wan beh ïa ka thong ka Marbisu ka la ïoh tang 63 run bad shah pynhap 10 wiket ha ki 15.1 over.
