Shillong, Lber 14
U MLA ka South Shillong, Bah Sanbor Shullai dang shen u la hiar ban leit jurip ïa ki jaka ban shna ïa ki surok shnong hapoh ka konstitwensi.
Kane ka jingleit jurip ka la long hadien ka jingïoh ïa ka song tyngka kaba T.1.98 klur lyngba ki skhim ka PWD. Kane ka projek la urlong da ka jingshimkhia u Bah Sanbor Shullai kum MLA.
Ha kane jingleit jurip, la synran lang ïa u Bah Sanbor da ki Karikor ka PWD Roads, ki heh ophisar na ka tnat Arts & Culture bad kiwei kiwei ha kaba la jurip ïa ka surok ba don hakhmat khyrdop jong ka Arts & Culture Rilbong (Raid Laban) shaduh sha Rilbong Community Hall kaban poi shaduh sha Umshyrpi na ka surok kaba la don lypa jong ka PWD ka Rhino Museum Rilbong Shillong.
U Bah Sanbor Shullai u la pynpaw ka jingsngewnguh ïa u Myntri Rangbah ka jylla u Conrad K Sangma, u Symbud Myntri Rangbah u Bah Prestone Tynsong, bad ïa ki Karikor bad ophisar ka tnat PWD, Arts & Culture, Planning bad Finance kiba la ai jingkyrshan bad jingïarap ban bhah tyngka ïa kane ka projek na ka bynta ka bha ka miat jong ki paid nongshong shnong ka Constituency.
Katba na ka liang kiwei ki nongkren ha ka jingïalang kila ïaroh ïa ka jingshimkhia u Bah Sanbor ban wanrah ïa ki skhim bapher bapher bad kila ong ba kine ki skhim kin ai jingmyntoi ïa ki nongshong shnong hapoh jong ka constituency.
