Shillong, Lber 14
Ka jingsahteng ban plie ïa ka Khasi Traditional Medicine Institute kaba la dep tei ha u Lumsohpetbneng, Ribhoi District ka la pynlong ïa uwei na ki nongai dawai kynbat Khasi ban kren bynñiaw ïa ka jingpynlut kai ïa ka pisa da ki klur ban tei ïa ka ïing khlem da lah ban pyntreikam.
Haba ïakren bad uwei na ki dkhot ka Khasi Traditional Medicine Commission u Bah DL Nongspung uba buh ïa ka karkhana shna dawai ha Mawlyngngot, East Khasi Hills, u la ong ba ki MDC ka Khasi Hills Autonomous District Council (KHADC) ki nang tang ban pynlut pisa tangba kim nang ban pyntreikam namar ïa katei ka jaka sumar ha Lumsohpetbneng kaba la pynlut da ki klur kim shym la lah ban pyntreikam haduh mynta.
U la ong ba haduh mynta katei ka Commission kam ju khot jingïalang shuh bad kane ka la pynduhnong kaba khraw namar katei ka jaka sumar kaba la buh lang ban ai jinghikai ïa ki samla ba kin tip kumno ban sumar dawai kynbat Khasi.
U la ong ba lada la plie ïa katei ka jaka sumar ka jinghikai ïa ki samla pule kan long beit 50 ngut ha ka shisnem bad hapoh shisnem shiteng ki la lah ban leit ai dawai ïa ki nongpang.
Nalor nangta, u la pynpaw ba ki kmie ki kpa ki ju pynlut pisa ban phah pule doktor shabar ka jylla, hynrei lada ki leit pule ban sumar dawai kynbat Khasi ka la ïarap shibun ïa ki.
“Nga ïohi ba ka jingtei ïa ka ïing ha Lumsohpetbneng ka dei tang ka jingpynlut kai ïa ka pisa namar haba la dep ïa ka jingtei ki la shu ieh khongreng haduh mynta” u la ong.
U la ïathuh ba ynda la plie ïa katei ka jaka sumar ki nongpang baroh kin wan ha katei ka jaka namar kin don ki doktor kin shong hangtei namar ka la don ka jaka thiah bad ka jaka ai jinghikai ruh.
U Bah Nongspung u dei uba la don ha kane ka kam ai dawai kynbat Khasi la palat 37 snem. Hynrei tang ha kine ki 10 haduh 15 snem u la sdang ban leh kyrpang namar ïa ki dawai u da song bad buh ruh ïa ka por ba la kut ka dawai.
U la ïathuh ba ka jaka shna dawai ka don ha Mawlyngngot bad shisien shi bnai u shong ha Nongstoiñ, Jowai, Sngi Saitjaiñ ha Laitumkhrah bad lada don ki nongpang kiba kwah ban sahmiet ki hap leit sha Mawlyngngot.
Shuh shuh u la ïathuh ba kane ka jingsumar dawai kynbat Khasi ka dei na sap kaba u la ïoh bad ka dei kaba hiar pateng na ki mei-ieid bad paieid.
U la pyntip ba ki briew mynta ki bun bha ka dei ka jingpang kpoh bad don ruh ki briew kiba la ai tika covid ki pang ki shyieng namar ki sahkut bad donkam ban pynkhem ba kin jem.
