Shillong, Lber 14
Ka Sorkar NDA ba ïalam da ka BJP ha Delhi ka dang bteng ban pynsyllang ïa ka Sorkar Jylla ha Meghalaya da kaba set shwa ïa ka pisa kaba dei ka bai thied tiar haba pyntrei ïa ki projek hapoh ka skhim bylla sngi kaba tip kum ka Mahatma Gandhi National Rural Employee Guarantee Scheme (MGNREGS) kaba long palat `300 klur, la ïathuh ka tyllong khubor.
Ha ka jingshisha, ka Meghalaya ka dei kawei na ki Jylla kaba pyntreikam bha ïa kane ka skhim bylla sngi ha kaba ki shnong ki thaw ki pyntrei bun ki projek kum ki surok ïaid kali hapoh shnong, ki lynti ïaid kjat bad kiwei kiwei kiba long ka jingmyntoi bad kyntiew ïa ki kam pynroi.
Hynrei kane ka skhim ka long ka jingduh mynsiem ïa ki Village Employment Council (VEC) namarba ka Sorkar Pdeng ka set ïa ka pisa kaba dei ka bai thied ïa ki tiar ki tar naduh ka dewbilat, maw bad shyiap, nar rod bad kiwei kiwei ki tiar kiba pyndonkam haba pyntrei ïa ki projek.
“Ngi ïai buddien na ka liang ka Sorkar Jylla hynrei haduh mynta ka pisa kaba dang sahteng ka kot palat T. 300 klur. Dang shen ngi la buddien ïa kane bad la kular ba yn pyllait teng ha u bnai wan kata ha u Ïaïong,” la ïathuh ka tyllong khubor.
Kum ban pynkynmaw, ha u snem 2021-2022 bad 2022-2023 ruh, ka Sorkar Jylla ka ïakynduh jingeh bha ban pyntrei ïa ka skhim MGNREGS namarba ka Sorkar Pdeng ka pynskhem ban pyllait pisa ban thied tiar.
