Bengaluru, Lber:
Hadien ba la sakhi kumba la pynbna khubor da kiba bun ki lad pathai khubor ba ka kynhun National Investigation Agency (NIA) ka la kem ïa suba donkti ha ka jingpynthei bom ha Bengaluru Cafe, ka kynhun tohkit ka la pynshai ha ka jingthoh ba la phah sha ki lad phah khubor ha kaba ka la kyntait halor kane bad ong ba kam pat kem ne pynngat ha ki kyndon aiñ haduh mynta ïa uba la shah kynnoh donkti namar ba ka jingtohkit ïa u ka dang ïaid shakhmat.
Ki la don kumba 9 ngut ki briew kiba la mynsaw hadien ba la bthei u bom IED ha ka jaka bam ba paw ha Rameshwaram Cafe ha ka 1 tarik, Lber. Ka kynhun tohkit, ha kine ki khyndiat sngi ka la pyllait paidbah ïa kiba bun ki durkhih ba la paw ha ki CCTV kiba la pyni ba une uba la shah kynnoh u la shang kylleng ki jaka da bun tylli ki bos.
Ka kynhun National Investigation Agency (NIA) da ka jingtrei shitom kaba khlem sangeh, ka la lap bad ïoh kem ïa u briew uba la shah thwet ha kaba ïadei bad ka jingdonkti jong u ha ka jingpynbthei bom kaba la pynmynsaw ïa kine ki 9 ngut ki briew ha Rameshwaram Cafe kaba don ha ka nongbah Bengaluru ha basdang une u bnai.
Kumba la ïathuh ka tyllong khubor jong ki pulit, la ong ba ïa une u briew la ngeit ba u la long u snar nongïalam ha kaba ïadei bad ka jingpynbthei bom ha kaba la ïohi ba u la leit buh ïa ka pla ha kane ka Cafe kumba la sakhi na ka jingpaw jong u ha ka Camera Footage ha katei ka sngi ba la jia ka jingjia.
Ka kynhun kaba ju ïakhun pyrshah halor ki kam pyntriem, kaba la shimti ban pynlong ïa ka jingtohkit halor kane ka jingjia ha ka 3 tarik, Lber, ka la pan ïa ka jingïatreilang jong ki riewpaidbah ha ka ban pynithuh ïa une uba la shah kynnoh ha kaba la ngeit ba u la buh ïa u bom Improvised Explosive Device (IED) ha kane ka jaka bam kaba paw bad ïaid ïew bha kaba ha Bengaluru ha ka 1 tarik, Lber.
Hadien ba la jia ka jingjia, ki pulit khlem da pynslem ki la pynlong ïa ka jingtohkit khnang ban ïoh ban kem ïa kiba donkti bad ym slem hadien kane lyngba ka jingkhmih bniah na ka CCTV la ïohi ïa u briew uba kit ka pla shadien uba la rung hapoh ka jaka bam bad buh ïa ka pla hapoh jong ka, bad hadien kane kumba la pynap, u bom u la bthei bad pynmynsaw ïa ki briew kiba don hapoh jong ka bad wanrah ruh ïa ki jingjulor ba bun.
Hadien kane, ka kynhun NIA ka la shimti ban pynlong ïa ka jingtohkit bad ïai buddien halor ka jingjia haduh ban da ïohkem ïa une u briew.
Ha kawei pat ka Camera Footage ha kajuh hi ka sngi ha ka por 9 baje mynmiet, la ïohi ba une uba la shah kynnoh u la shang hapoh ka jaka sangeh bos.
Kumba la ïathuh ka kynhun tohkit, la ong ba une uba la shah suba u la kylliang ïa ki jaiñ jong u hadien ba la jia ka jingbthei bom bad leit jingleit da ki bos na kawei ka jaka sha kawei pat.
