Hyderabad, Lber:
U Myntri jong ka sorkar kmie uba dei khmih ïa ka tnat ki kam pohïing u Amit Shah u la kyntu ïa ki briew jong ka Telangana ba kin pynïoh jingjop ha kumba 12 tylli ki konstitwensi ha ka ilekshon Lok Sabha ban ïarap ha ka ban pynjop ïa u Myntri Rangbahduh u Narendra Modi ha ki 400 tylli ki konstitwensi kiba don ha ka ri.
Ha ka jingai jingkren ha ka jingïalang jong ka Social Media Warrior ha ka Sngi Ba-ar, u Shah u la batai shai da kaba ong ba ki la don ki bynta kiba kongsan ba la leh da ki nongpathai khubor bad ban pynsaphriang ïa ki khubor ha kaba ïadei bad ka jingai mynsiem ha kylleng ka ri halor ka jingkyrmen ban ïoh long Myntri Rangbahduh biang u Modi ha ka sien balai.
U Shah u la buh ka jingkyrpad ïa ki briew jong ka Telangana ba kin leh ïa kaba donkam ha ka ban buh thong ban pynjop ha ki 400 tylli ki konstitwensi da kaba ai jingkyrshan ïa ka seng BJP ha ka ilekshon.
U Shah u la pynpaw ïa ki jinglah pyntreikam jong ka sorkar u Modi ha kine ki 10 snem ba la leit, kynthup ha kaba ïadei bad ka jingskhem jong ka kam saiñ pyrthei, ha kaba la lah ban pyllait ïa ka sorkar na ka kam bamsap bad ka jingkiew sted ha ka liang ka ïoh-ka kot.
