Shillong, Lber 14
U Myntri Rangbah ka Jylla u Conrad K Sangma u la plie ïa ka Talent Identification phase 3 bad ka Elite Pathway Program 2024-25 ha ka Sngi Palei ha shlem treikam jong ka S.A.I Training Center ha NEHU, Shillong.
Ha kane ka program la wan sakhi lang lang u khlur ak phlim Bollywood u John Abraham ha ryng-kat ka jingïadon lang u Chief Secretary Bah D.P Wahlang, ka Director ka tnat ïalehkai Kong Isawanda Laloo, u Workings Presi-dent Bah John F. Khar-shiing bad kiwei kiwei.
Hapoh kane ka skhim la khot sngewbha ïa kumba 500 ngut ki khynnah na ka Jylla ba kin wan shim bynta sha kane ka prokram khnang ban ithuh ïa ki sap ba kyrpang jong ki.
Ha ka sien kaba nyng-kong eh la sdang ïa ka Talent Identification Pro-gram bad ka Elite Path-way Program (EPP), hapoh ka STAR Program. Ïa kane ka prokram la ïatrei lang bad ka Meghalaya State Olympic Association (MSOA).
Ha katei ka prokram kaba nyngkong ki la don haduh 14,500 ki khynnah kiba la wan ïashim bynta ha ka Talent Identification Program ha kaba la pyndonkam da ki tiar ki tar ka juk stad mynta na ka bynta ban ithuh ia ki sap kiba kyrpang jong ki khynnah.
Napdeng kitei, 200 ngut ki khynnah ki la ïoh ka jingshah hikai kat haduh ba la lah ban jied ïa 11 ngut kiba kham kynsai bad mynta ki la don ha ka jingshah hikai kaba paka jong ka Super Elite Program namar ka jingthmu ka long ban saiñ dur ia ki bad ba kin lah ban kiew kyrdan shaduh ka Olympic.
Ha kane kajuh hi ka sngi la sam khusnam sha ki 388 ngut ki nongïa-lehkai kiba la lah ban pynpaw ïa ka jingtbit ha ki prokram ïalehkai bapher bapher kiba la long ha ka thaiñ shatei lammihngi bad kumjuh ha ki jylla bapher bapher jong ka ri. Kumjuh ruh la sam khusnam ruh sha ki samla kiba don ha la ki jong ki sap bapher bapher kum ha ka put ka temm ka rwai ka siaw, ka shad ka mastih bad kiwei.
Ka jingpynlut ha kaba sam khusnam sha baroh ki samla ïalehkai bad kiba don ha la ki jong ki sap bapher bapher ka long haduh T. 5 klur.
