Jowai, Lber:
Ka Rural Craft and Engineering Division (RCE) ka la pynlong ïa ka ‘Marketing and Promotional Workshop’ ba ar sngi kynthih halor ka mat “Scheme on Studies for Promotion & Strengthening of Black Pottery” ha ka 12 tarik bad 13 tarik Lber ha ka shnong Tyrshang bad Larnai, West Jaiñtia Hills District.
Ha ka jingïalang plie kaba la long ha Tyrshi Inn ha Khliehtyrshi la ïa don lang u Joint Director Commerce and Industries, Shillong u Bah ML Wanshong kum u Kongsan bad u General Manager ka DCIC, Jowai, u Bah B Warjri kum u Symbud Kongsan.
Kane ka project ka dei kaba la bei tyngka da ka tnat Commerce and Industries (DCI) ka sorkar Jylla, bad la pyntreikam da ka Mahatma Gandhi Institute of Rural Industrialization (MGIRI), Wardha, Maharashtra kaba dei ka research and development institute kaba hapoh jong ka Ministry of MSME, ka sorkar India.
Ka jingthmu ba kongsan jong kane ka projek ka long ban kyntiew ïa ki kam karkhana kiba pynmih ïa ki jingshna tynrai kumjuh ban kyntiew ïa ka ïew ka hat, bad pynjur ïa ka jingpynmih ïa ki tiar shna kti ne artisans, ban pynïoh-nong bad ban plie ïa ki lad ïoh jam ïoh jam na ka bynta ki nongshna kti bad ki nongseng kam lajong ha ki thaiñ nongkyndong.
Kane ka thmu ruh ban pynkhlaiñ ïa ki jingtreikam jong ki trai shnong, bad plie ïa ki lad sengkam lyngba ki sap ki phong tynrai, ban kyntiew ïa ki jingtreikam lyngba ka teknologi bad ïa ki ïew ki hat bad ban wad ïa ki lad ki lynti kiba thymmai.
Nalor kata kane ka projek ka thmu ruh ban kyntiew kyrpang ïa ki nongshna khiew khyndew ne ‘black pottery,’ ban kyntiew ïa ki sap ki phong jong ki bad ban kyntiew ïa ka jingpynmih mar bad ban pyniaid iew ia ki.
U Joint Director ka tnat Commerce & Industries u la ai khublei ïa ki nongpynïaid halor ka jingkyrshan na ka bynta kine ki nongshna bad ki nongthaiñ kti khamtam ha kaba ïadei bad ka jingshna ïa kine ki khiew khyndew hapoh ka shnong Larnai bad Tyrshang.
U la ong ruh ba kine ki nongshna kti ki la ïoh jingmyntoi shibun lyngba kane ka prokram aijinghikai bad na ki jingleit jurip ban pynpaw ïa ki sap ki phong bad ban ïoh jingmut shuh shuh ha kaba ïadei bad kane ka kam. Nalor kata u kyntu ruh ïa kine ki nongshna kti ba kin sam lem ruh ïa ki jingtip bad ban ïamir jingmut lang ïa ki jingshem bad ïa ki buit na ka bynta ka jingmyntoi jong kiba bun.
Katba na ka liang u Dr. K Venkata Rao, Deputy Director of Rural Craft and Engineering, u pyntip ba kane ka prokram ba ar sngi ka thmu ban pynshai paidbah halor ki sienjam bad ki lad bapher bapher kumno ban pynïaid ïew bad ban kyntiew ïa ka jingpynmih ïa ki khiew bad kiwei ki tiar ba la shna da ka khyndew.
