Mawkyrwat, Lber 14
Ka Golden Lion FC ka la jam sha ka final ha ka lympung ïalehkai Mawlangwir Football Inviatation Tournament 2023-24 hadien ba ka la lah ban pynliem noh ïa ka Niaw Wasa FC da 4-3 kol lyngba ka tie-breaker ha ka semi final (2nd Leg) kaba la long ha ka 13 tarik ha madan Rowell Lyngdoh Stadium Saitsnad Mawlangwir.
Kane ka jingïalehkai ka long shisha kaba itynnad bad pynhun jrut ïa ki paidbah ‘riew ïeit phutbol khamtam ïa ka Golden Lion FC kaba la lah ban ïalehkai bha naduh ba sdang bad ka donkam ban pynïakhaid ar kol kiba ka Niaw Wasa ka la tam ha ka wat kaba nyngkong.
Ha ka kylla step ka Golden Lion ka pyrshang ban ïalehkai bha bad ñoin tyngeh ban ïoh thep kol hynrei da ka jingtbit ki rangapdien ka Niaw Wasa kim shym la ïoh lad ban pynkhih jar.
Dei ha ka minit kaba 43 shwa ban kut ka kylla step ba ka Golden Lion ka la ïoh ban pynkhih jar kaba nyngkong lyngba ka jingtrei shitom u rangïalehkai shakhmat ka Golden Lion u Jackson ha kaba u ïoh ban thep ïa ka kol kaba itynnad bha da ka khlieh.
Ha ka kylla miet ka jingïalehkai ka la nang kham itynnad shuh shuh ha kaba baroh ar kynhun ki la ïakhun tyngeh ban ïoh ïa ka nam jop. Hynrei, da ka jingtbit ki rangïalehkai shakhmat ka Golden Lion ha ka minit kaba 82 u Sheen Stevenson Sohktung u la ïoh ban thep sa kawei ka kol bad haba kheiñ ïa ki kol ka la poi ha ka jingïakhaid mar kajuh ki kol.
Ka jingïalehkai ka la poi sha ka extra time, hynrei baroh artylli ki kynhun kim shym la lah ban thep kol bad ha kaba khadduh la ïoh ban pynïalehkai noh da ka tie- breaker ha kaba ka Golden lion ka la ïoh ban pynrung 4 tylli ki kol, katba ka Niaw Wasa 3 tylli ki kol bad pynlong ïa ka Golden Lion ban rung syndon sha ka final ha kane ka lympung.
Kum ban shu pynkynmaw ha ka semi final (1st Leg), ka Niaw Wasa la jop da 3- 1 kol ïa ka Golden Lion bad ha ka wat kaba ar ka Golden Lion ka la thep 2-0 kol bad haba kheiñ lang ïa ki kol baroh artylli ki kynhun ki la poi sha ka jingïakhaid ha kaba ki la ïoh ban thep mar 3 tylli ki kol. Ïa ka nam man of the match la ioh da u rangapkol ka Golden Lion FC.
Ka Mawlangwir SC ka ka pyntip ruh ba ka jinglehkai semi final kaba ar (2nd Leg) kan long hapdeng ka Shillong Lajong pyrshah ïa ka KMC Sonapur bad kine ki ar tylli ki kynhun kin sa ïaknieh ban ïoh rung sha ka final ka ban long ha ka 21 tarik mynta u bnai.
