Shillong, Lber 14
Ka Sorkar ka la ithuh katto-katne ki kam ha ka thup ki karkhana bad kine kin ïarap ba kyntiew ïa ka Jylla ha ka jinglah ban seng kam bad aikam ïa ki nongshong shnong.
Kine ki kynthup ïa ka kam jngohkai (tourism), saiñ jingbam (food processing), thaiñ jaiñ bad thaiñ kti (textiles and handloom) namar la ñiew kum ki lad ban seng kam bad aikam ïa kiwei.
U Myntri Rangbah u Conrad K Sangma ruh u la ong ba kine ki dei kum ki karkhana kiba lah ban pynmih bun ki kam bad kan long ka jingmyntoi ïa ki briew ka Jylla lyngba ki lad kamai bapher bapher.
U la ong ba ka Sorkar Jylla ka pynshlur ïa kine ki kam bad ha ka liang ka kam jngohkai lei lei, la plielad ïa ki trai muluk ban ïoh ka lad ban shna ïa ki jaka lane ïingbasa na ka bynta ki nongjngohkai ha ryngkat ka jingkyrshan (subsidy) kaba la ai da ka Sorkar nalor ka jingpyllait ïa ki kali Prime Tourism kiba don ruh ka jingïarap lyngba ka subsidy nalor kiwei pat ki lad.
U la ong ba ruh ba ki don ruh ki samla kiba shah hikai kumno ban pdiang bad kren ïa ki nongjngohkai nalor kiwei pat ki bynta kum ka jingïalam lynti ïa ki nongjngohkai.
U Myntri Rangbah u la ong ba ka jingshna jingbam ka dei ruh kawei na ki lad kaba biang tam ban kyntiew ïa ka jingkamai ki nongshong shnong, nalor ki kam thaiñ jingthaiñ bad pynïaid ïew ïa ki mar ki mata kiba pynmih da ki trai shnong trai Jylla.
U la ong ruh ba ka kam shna phlim ka dei kawei kaba la Sorkar ka la ithuh kum ka karkhana nalor ka rwai ka siaw bad ka put ka tem kaba plielad ïa kiba donsap ban pyni ïa ki sap ki phong bad wanrah burom ruh ïa ka Jylla.
