Shillong, Lber 14
Ka King of Kings Higher Secondary School, Mawkyr-dep ha ka Sngi Balang ka la sdang noh ïa ka Inter House Athletic Meet ba shisien shi snem kum shi bynta ban plie lad bad ai rynsan ïa ki khynnah pule jong ka skul ba kin ïoh ban pyni ïa la ka sap ka phong ha ki kam ïalehkai bapher bapher nalor ka jingpule ka jongki kaba man la ka sngi.
Ïa kane ka rynsan ïalehkai la pynlong ha ka madan jong ka shnong Mawkyrdep bad la wan ban plie pyrda da u Bah Cornelius Laloo, uwei na ki nongthoh khubor ba la rim jong ka Ri Bhoi District ha ka jingdon ryngkat jong ka Principal ka skul, ka Sr. Lily Mary Kharbuki, ki nonghikai ba kynthup ïa ka Sr. Wismary Kharbihkhiew, u Babu Michael Lyngdoh bad kiwei kiwei de nalor ki khynnah skul.
Hadien ka jingplie pyrda ïa kane ka lympung ïalehkai ba shisien shisnem, la pynlong shwa ïa ka jingïaid March Pass da ki khynnah jong ka skul kiba la phiah ha ki ïing lane kita ki house bapher bapher kiba kynthup ia ka Red House, Blue House, Yellow House bad Green House, kaba la pynbud pat da ka jingthang sharak bad ka jingbam smai jong ki khynah skul ba ki hap ban bud ïa ka mynsiem jong jingïalehkai ha kane ka lympung.
Haba ai jingkren ha kane ka sngi, u Bah Cornelius Laloo u la ai ka jingïaroh sha ki bor pynïaid skul kiba la shim khia ban pynlong ïa kane ka lympung ïalehkai kaba shisien shisnem kum shi bynta ban plie lad plie lynti ïa ki khynnah skul ba kin ïoh ïa ka rynsan ban pyni ïa la ka sap ka phong lyngba ki jingïalehkai bapher bapher.
U Bah Cornelius Laloo u la ong ruh ba ka kam ïalehkai hi ka dei kawei na ki bynta kaba kongsan ha ka jingim jong ki briew ym tang na ka bynta ka jingkoit jingkhiah, hynrei na ka bynta ka pyrkhat pyrdaiñ, ban heh ban san ha ka rukom kaba shait ba khlaiñ bad ruh ka hikai ba ngi dei ban poi sha ka thong jong ka jingjop lyngba ka jingtrei minot bad trei shitom.
Kumba ka jingkynrei jong ki jingdih pynbuaid ha kine ki sngi ka long kaba shyrkhei, u Bah Cornelius Laloo u la kyntu ruh ïa ki khynnah skul ba ki dei ban kiar lai lum lai \wah na ki jingdih ba sniew kum u biri u sikret, ka kyiad bad khamtam eh ia u drok bad ruh ban kiar na ka shongkha khynnah, hynrei ba kidei ban puson bad minot thop ha la ki jingpule khnang ba ki lah ban poi sha ka thong jong ka jingjop ha ka jingim ka jong ki.
Ha kane ka sngi, la pyniphuh iphieng shuh shuh lyngba ki jingrwai bapher bapher, ki jingshad bad mass drill ba la iashim bynta shitrhem da ki khynnah pule jong ka skul.
