Shillong, Lber 14
Ka Sorkar Jylla ka la pynkhreh ban ai T. 700 klur kum ka jingai mynsiem (incentive) ïa kiba bei pisa ban seng kam lyngba ki karkhana bad kiwei kiwei lad pynmih kam kaba kot sha ka T. 8,340 klur ha kaba la soi ruh ïa ki soskular sngewthuh jingmut (memorandum of understanding) kumba khyndai tylli na ka bynta ban seng kam ha Jylla ha ka jingmang pisa kaba kot sha ka T. 2,957 klur.
Ïa kane la pynbna da u Myntri Rangbah, u Conrad K Sangma haba kren sha ki lad pathai khubor ha ka Sngi Palei.
Kine ki jingbei pisa ban seng kam lyngba ki karkhana bad kiwei kiwei ki lad ha ryngkat ka jingai jingkyrshan ka Sorkar ïa kiba bei pisa kum jingai mynsiem ïa kaei kaba ki leh (incentive) ki long ruh shibynta ban pynpoi ïa ka Jylla sha ka thong jong ka ïoh ka kot kaba kot sha ka 10 Billion Dollar kumba la dep maitphang ha ka mang tyngka jong u snem 2023-2024 kaba tip kum ka ‘Mission 10’ kaba la wanrah dang shen ha Ïingdorbar Thawaiñ da u Myntri Rangbah.
Kawei na khyndai tylli ki soskular ka dei ka jingpynkhreh ban buh ïa ka Pepsi Plant ha kane ka Jylla ha ka jingbei pisa kumba T. 180 klur. Ïa kane ka jingdih pyngngad yn lah ruh ban shalan na Meghalaya sha kiwei ki jaka kum sha North Bengal bad kiwei ki bynta jong ka Assam.
Haba ai nuksa ïa ka Pepsi Plant, u la ong ba tang kane kawei ka karkhana pynmih jingdih pyngngad ka donkam palat 20 akar ka jaka bad la dep ban peit ïa ka jaka ha Mendipathar.
Haba kylli shaphang ka jingeh ban ïoh jaka ban seng karkhana namar ka ju mih ki jingpyrshah, u Myntri Rangbah u la ong ba ka Sorkar ka la shim ki lad ki lynti haba ïadei bad kane.
U Conrad u la ïathuh ba ki don khyndai tylli ki MoU kiba la ïasoi ha kane ka shitaïew ban seng ïa ki karkhana kiba kynthup ïa ki kam bapher bapher kum ka kam jngohkai, saiñ jingbam (food processing), ka jingpyndonkam ïa ki kor ki bor (technology) bad pharmaceutical bad ruh ki jingdih bad kine baroh ki kot sha ka T. 2957 klur kum ka jingpyntreikam ïa ka MIIPP 2024.
U ïathuh ruh ba ka Sorkar Jylla ka la soi MoU bad ka North East United Football Club jong u John Abraham ban seng ïa ka shlem ai jinghikai kaba tip kum ka Residential Football Academy bad ïa kane yn buh ha thaiñ Mawkhanu.
Ki kompani kiba la ïasoi ïa ki soskular (MoU) da kaba kular ban bei tyngka ha Meghalaya ki kynthup ruh ïa ka Ramky Infrastructure Ltd (T. 2000 klur), Polo Towers Group (T. 465 klur), Sonar Bangla Group (T. 90 klur), Quadra Infratel Synergies Pvt Ltd (T. 100 klur), Seven Sister Resources (T. 1 klur), Playmaker Labs (T. 1.2 klur), AI Genix (T. 100 klur), Lallooji & Sons (T. 100 klur), bad ka Varun Beverages Ltd (T. 100 klur).
U Conrad u la ong ba ka Sorkar Jylla ka angnud ban wanrah ïa ka jingbei pisa kumba T. 8,340 klur kaba lah ban aikam bad na ka Sorkar Jylla kum ka jingai mynsiem ïa kine kiba bei pisa ban seng kam kan don ka jingai jingmyntoi tang kum ban ai mynsiem ïa ki bad ïa kane la mang kumba `700 klur.
Halor ka jinglah ban kynjoh sha ka ïoh ka kot kaba 10 billion US dollar, u la ong ba ka Sorkar Jylla ka la buh jingkheiñ ba kaba duna eh ka jingbei pisa ka dei la kumno-kumno 1 billion dollar na ka bynta ban seng kam lyngba ki kompani shimet.
U Conrad u la ong ba lyngba kine ki lad ki lynti yn lah ban thaw kumba 50,000 tylli ki kam lyngba ka jingpyntreikam ïa kane ka Industrial Policy ba thymmai nalor ka jingthaw kam kumba 40,000 tyli lyngba ka CM Elevate.
Haba kylli halor ka jingpyrshah ban wan trei kiba nabar Jylla, u Myntri Rangbah u la ong ba ha kane ka MIIPP 2024, ka la don lypa ka jingphaikhmat ban aikam ïa ki trai shnong kumba 90 na ka 100. Kane lehse kan weng ïa kane ka jingeh bad ha kajuh ka por kan pyntikna ba ki nongseng kam ki hap aikam ïa ki nongshong shnong ka Jylla bad kan long shisha ka jingmyntoi.
