Jowai, Lber 14
Uwei u briew la suba ba u la shah pynïap dusmon ha ki briew ki bym lah satia ban ithuh ha West Jaiñtia Hills District. Une uba suba shah pynïap u dei ba la tip kum u Kyrshandame Talang, 29 snem ka rta.
Katkum ka jingmudui ejahar kaba la ujor ha thanat Ummulong, ka kmie jong u Kyrshandame, Kong Lakmon Talang ba shong ba sah ha Mupliang, ka la pyntip ba u khun jong ka (Late) Kyrshandame Talang, u la shah pynïap dusmon ha ki briew ki bym lah satia ban ithuh.
Ka la ïathuh ba kane ka jingjia ka la jia ha kawei ka jaka kaba la tip kum ka Moosdai ka jaka kaba hap ha khappud jong ka shnong Myrjai bad Mukhla.
Katkum ka ejahar ka la ong ba u khun jong ka, u Kyrshandame ha ka 10 tarik Lber, u la ïadih kyiad bad ki paralok ha kawei ka dukan ha Moosdai. La ong ba u la mih shuwa marwei khlem ïathuh ïa ki paralok.
Dei hadien ar sngi la lap ïa ka metïap jong u kaba la thiah lyngktar bad lyngkhuit kaba jngai kumba 500 metre na dukan kyiad.
Halor kane ka jingjia, na ka liang ka kmie ka la kyrpad jur ïa ki pulit ban tohkit bniah halor kane ka jingjia.
Na ka liang ka seng HNYF Thadlaskeiñ Circle bad ka Dorbar Shnong Myrjai ka la pynrem jur halor kane ka jingjia bad phah ruh ïa ka jingsngewlem sha ki bahaïing u Kyrshandame.
