Shillong, Lber 14
U General Secretary bad Publicity Secretary ka Hynñiewtrep National Liberation Council (HNLC), u Bah Saiñkupar Nongtraw, ha ka Sngi Palei u la ong ba ki arngut ki Symbud Myntri Rangbah ka jylla, u Bah Prestone Tynsong bad u Bah Sniawbhalang Dhar, ki ïasyriem lane ki long kum u kada kit blei thaw kumba la thoh ha “Ki Phawer U Aesop”.
Ha u kyrwoh khubor, u Bah Saiñkupar, haba pynbna ba ka HNLC ka la don bynta ha ka jingpynbthei bom IED ha Them Ïew Mawlong, u la ong, “U Bah Prestone bad Sniawbhalang ki la shah pyndonkam ha ki nongïalam na Garo kum u Mukul Sangma bad u Conrad K Sangma ban ïoh jingmyntoi saiñpyrthei. Kane ka la long ha ka por ba ki dang don ha ka seng Congress bad mynta hapoh ka seng NPP. Kine ki arngut ki ïasyriem bad u kada kit blei thaw kumba la thoh ha “Ki Phawer U Aesop”.”
Nalorkata, u la ong ba kitei ki arngut ki Symbud Myntri Rangbah kim don satia ka saiñpyrkhat kaba laitluid ban pyrkhat na ka bynta ïalade.
Lah ban kdew ba ka jingsneng ha “Ki Phawer U Aesop” ha kaba ïadei bad ka jingïathuhkhana “U kada kit blei thaw” ka long: “U ‘Kalbut – hala-re-hala!’ u tur ïap-ïap im-im sha ka lehraiñ.”
