Shillong, Lber 14
U MLA ka UDP na Amlarem, Bah Lahkmen Rymbui, u la ong ba lada u kyrtong MP jong ka Voice of the People Party (VPP) u dei uba ieid shisha ïa ka jaidbynriew u dei ban iehnoh na ka kam nonghikai ha NEHU bad wan sha u paidbah.
“Ki don kiba ong ba ki ieid ïa ka jaidbynriew ban pan jingkyrshan na u paidbah, hynrei ngam dei ba nga kynthoh, u kyrtong ka VPP u dang dei u ar maloi, synshar ha NEHU bad leit ïaleh ilekshon bad lada rem ruh yn leit hikai biang,” la ong u Bah Lahkmen haba kren ha ka jingïalang pan jingkyrshan na ka bynta u kyrtong ka UDP u Bah Robertjune Kharjahrin kaba la long ha ka Sngi Balang ha ïew Dawki Bakur.
“Hato kum kita mo kiba ieid jaidbynriew, lada phi ieid jaidbynriew iehnoh na ka kam hikai bad wan sha u paidbah ban treilang ryngkat hynrei ngan leit ïaleh da kaba ieid ri, lada rem ngan leit hikai biang, kumba nga leh ma nga, ha kaba nga la resign na ka kam sorkar ban rung sha ka politik bad ïaleh ilekshon, kam pher lada nga jop ne rem, nga don beit bad u paidbah,” la ong u Bah Rymbui.
U la ong, “Ha ka ri jong ngi don kiba im ja na ka kyrteng jong ka jaidbynriew, bad don pat kiba ieid ïa ka jaidbynriew, bunsien lada phi ieid, ieid da ka kam, ym dei ban ieid tang na shyntur.”
“Ngi dei ban peit kumno ba ngin jied ïa ki nongmihkhmat. Kumno yn ieid ïa ka jaidbynriew lada ka kpoh ka thylli. Ngam ieid jaidbynriew lada ka kpoh nga ka thylli, ban ieid ïa ka jaidbynriew ka dei kumno ba ngin kyntiew ïa ka imlang ka sahlang, lada kane ka ïew Bakur kan kiew, ngin lah ban ieid, u bar jylla un nym lah ban ieid,” la ong une u MLA ka Amlarem.
“Mynshwa por ba ngi dang khynnah, ki dukan ha Bakur ki dei ba la pynïaid da ki bar jylla, hynrei namar ba ngi ieid ïa ka jaidbynriew mynta ki dukan ki dei jong ki Pnar,” u la ong.
“Paidbah ngi dei ban sngewthuh kumno ban ieid ïa ka jaidbynriew, hynrei shu kynnoh ba baroh ki MLA ki bamsap, dei ban sngewthuh ki don ki aiñ ki kanun, peit kine ki briew kiba pyntieng ïa phi mynta baroh, ki briew kiba ieid ïa ka jaidbynriew kaei ka iktiar kaba ki ïoh, kiba hok,” u la ong.
“Ki briew kiba nang ban pynriewspah ïa ka konstitwensi ki dei kita kiba ieid jaidbynriew, peit ka Nongkrem konstitwensi ka don katno tylli ki Govt Secondary School, ym don tang kawei ruh hapoh Nongkrem, hato ieid ri. 10 snem tam, ka don tang kawei ka PHC ha Nongkrem konstitwensi, hato ieid ri, katba hapoh War Jaiñtia don ar tylli ki Govt Secondary School, kawei ka kolej ba ai pisa da ka sorkar, ngi don bun tylli ki PHC namar ba ki longshwa-manshwa ki jong ngi, ki dei kiba ieid ri, kita ki dei kiba ieid jaidbynriew, namar ba ki peit ba kine ki jong ngi, kim dei ban poi sha Shillong,” la ong u Bah Rymbui.
Ki paidbah ki dei ban peit ba ki don bun kiba pynthohbria ha ka kyrteng jong ka jaidbynriew, u la ong bad bynrap “Nga ha ka por ba ïalap ilekshon, ngam ju ong na ka bynta ka ri bad ka jaidbynriew, nga ong na ka bynta ka konstitwensi.”
