Shillong, Lber 15
U President ka BJP hapoh ka Jylla, u Rikman G. Momin u la ong ba ki don 11 tylli ki kyrteng kiba la phah sha ka Central Parliamentary Board (CPB) jong ka seng na bynta ban jied ïa ki kyrtong ki ban ïa aireng ha kane ka ilekshon ban wan sha ka Lok Sabha.
“Ngi ruh ngi dang ïai ap, ngim pat tip namar ka thup kyrteng kaba lai shen kan sa mih. Ngi la dep phah ïa baroh ki kyrteng jong ki kyrtong sha ka Central Parliamentary Board,” la ong u Momin haba kren sha ki lad pathai khubor ha ka Sngi Thohdieng halor ka jingpynbna kyrtong ka BJP na bynta ka ilekshon MP ban wan.
U la ïathuh ruh ba ki don 6 tylli ki kyrteng kiba la phah na bynta ka Tura Parliamentary konstitwensi bad 5 tylli na bynta ka Shillong Parliamentary konstitwensi ba kynthup ïa ka kyrteng u Myntri ka Sorkar Jylla, Bah A.L. Hek.
Ki kyrteng jong ki 6 ngut kiba pan tiket na Tura Parliamentary konstitwensi ki kynthup ïa u MDC ka seng, u Bernard N. Marak, MLA barim, u Winnerson D. Sangma, Boston Marak, Riya Sangma, K.C. Boro bad Thomas Marak.
Haba phai pat sha Shillong Parliamentary konstitwensi, nalor ka kyrteng u Bah Hek, ki 4 ngut kiwei pat kiba la pan tiket ki kynthup ïa u President barim ka seng, Bah Ernest Mawrie, President ka BJYM, u Mewaker Lyngdoh, Dr. Fenela Lyngdoh Nonglait bad Sumitra Laloo.
Na ka liang u Momin u la kdew ba ka jingpynbna kyrteng baroh ka shong ha ki bor ba halor jong ka seng, hynrei na ka liang ka BJP hapoh ka Jylla ka la pyndep la ka kamram ban phah ïa ki kyrteng jong baroh kiba pan tiket.
Haba kylli, u la ong, “Lehse ki kyrtong na bynta ka Jylla kin sa paw ha ka thup kyrteng kaba 3 ka ban sa mih shen.”
Shuh shuh utei u nongïalam u la bynrap ba ka seng ka long kaba la khreh ban ïakhun ïa ka ilekshon ban wan bad ka jingïalap ilekshon ka la ïaid shaid-shaid, ha kaba ha baroh ki jaka, ka seng ka la pyntyllun ïa ki kam ki jam.
Nalor kane, u la pyntikna ruh ba ka mat halor ka CAA kan ym don jingktah eiei ïa ka seng ha kane ka ilekshon ban wan sha ka Lok Sabha.
Kumba ka long mynta, ki seng kiba la dep pynbna kyrtong na bynta ka ilekshon MP ki kynthup ïa ka VPP – Dr. Ricky A.J. Syngkon (Shillong Parliamentary konstitwensi), NPP – Dr. M. Ampareen Lyngdoh (Shillong Parliamentary konstitwensi) bad Agatha K. Sangma (Tura Parliamentary konstitwensi), Congress – Bah Vincent H. Pala (Shillong Parliamentary konstitwensi) bad Saleng A. Sangma (Tura Parliamentary konstitwensi), RDA – Bah Robertjune Kharjahrin (Shillong Parliamentary konstitwensi) nalor 2 ngut ki kyrtong shimet na Shillong Parliamentary konstitwensi – Prof. Lakhon Kma bad Bah Peter Challam.
