Shillong, Lber 15
Ka Manchester City kan pynkhreh ban ïai bat biang ïa ka nam lahduh ha ka Champions League.Kane ka kynhun kan ïakhun pyrshah ïa ka Real Madrid, katba ka Arsenal kan ïakhun pyrshah ïa ka Bayern Munich, hadien ba la dep ban pynïakap ïa ki kynhun na ka bynta ka jingïakhun quarter-final ha ka Sngi Thohdieng.
Kitei kynhun ïalehkai jong ka Premier League ki lah ban ïakynduh ha ka semi final pyrshah lada jia ba ki jop.
Ka lah ban long ruh ka kabu ksiar ïa ki kynhun ïalehkai kiba na Spain kin ïakynduh pyrshah ha ka semi final hadien ba ka Atletico Madrid ka la shah pynïakap na ka bynta ban ïakhun pyrshah ïa ka Borussia Dortmund bad ka Barcelona pyrshah ïa ka Paris Saint-Germain.
Ha ka aïom ba la dep, ka City ka la lah ban pynliem ïa ka Madrid da 5-1 kol ha ka semi-final.
U director ka City u Txiki Begiristain u la khmih lynti ba ka kynhun jong u kan ïai bteng ban bat biang ïa ka nam lahduh. “Ngi la lah ban ïalehkai bha ha kane ka lympung bad ngi la lah ban khur ïa ka jingjop. Ngi la long ka kynhun kaba khlaiñ bor. Te kumta ngi donkam ban pynliem ïa ka Real Madrid.”
Kumjuh ka Arsenal ka donkam ban ïakhun tyngeh pyrshah ïa u rangïalehkai shakhmat barim ka Tottenham u Harry Kane. Utei u kapten ka England u la lah ban thep 34 kol na ka bynta ka kynhun jong u Thomas Tuchel, kynthup ïa saw tylli ki hat-trick ha kane ka aïom kaba nyngkong jong ka aïom ïalehkai Bundesliga.
Ha ki jingleit ïalehkai ba la dep sha Bayern, ka Arsenal ka la lah ban pynkut ïa ka jingshah rem da 5-1 kol ha ka aïom ïalehkai 2015-16 bad 2016-17.
“Ngi la don hapdeng ka jingeh ha kane ka jingïaid lynti ha ka kam ïalehkai namar mynta ngin ïakhun pyrshah ïa ka kynhun kaba khlaiñ bor na Europe bad kaba la ju ïalehkai ha ki lympung ïalehkai kiba heh,” la ong u Tuchel.
“Ka long ka kynhun ka lah ban thep kol bun. Hynrei ngi la long ba la khreh ban ïakhun pyrshah ïa kata ka kynhun.”
Kumba ka paw ki nongkyrshan ka Bayern kin ym lah ban ïalehkai sha ka jingïakhun pyrshah ha Arsenal namar ka Uefa ka la khang pyrshah na ka daw ba ki nongkyrshan ki la kawang ïa ki bom pataka sha madan ïalehkai ha u bnai ba la lah ha Lazio.
Na ka liang u manager ka PSG, u Luis Enrique un ïakynduh ia ka klob kaba rim ka jong u ka Barcelona, kaba la lah ban pynurlong ban khur ïa ka nam lahduh ha ka Champions League ha u 2015.
Kane ka jingïakhun quarter-final (first leg) kan long ha ka 9 bad 10 tarik u Ïaïong bad ïa ka wat kaba ar yn pynlong hadien shitaiew. Ïa ka semi-final yn pynlong ha ka 30 tarik u Ïaïong bad 1 tarik u Jymmang. Ka Wembley kan pynlong ïa ka jingïakhun final ha ka 1 tarik u Jylliew.
