Nongstoiñ, Lber 15
Ka Kurbah jong ka jaid Kharbani Khasi bad Jaiñtia ha ka Sngi Thohdieng ka la shim ïa ka rai bad thung da ka komiti ban pynlong ïa ka jingbuddien halor ka jingshah pynïap u Mackbornbonny Kharbani uba la shah pynïap dusmon ha ki runar ha ka miet shiteng synñia jong ka 3 tarik u bnai Lber 2024 ha jaka ïeng taksi Kynroh hapoh ka Sor Nongstoiñ.
Na ka liang u Bah Macmillan Kharbani, General Secretary ka Kurbah Kharbani, u la ong ba halor katei ka jingjia, ka Executive Committee jong ka kur ha ka Sngi Thohdieng ka la pynlong ïa ka jingïalang kyrpang ban ïathir jingmut bad ban ïa pyrkhat sani bha.
U Bah Macmillan Kharbani u la ong ruh ba ka kur ka ai ka jingkyshan pura ïa ka Kong Violin Kharbani, kmie jong u samla Macbornbonnyson bad ka ïing ka sem haduh ba kin da ïoh ïa ka hok.
Shuh shuh u la ong ruh ba katkum ka jingïoh jingtip, la sngewthuh ba ki dang don ruh sa kiwei pat kiba donkti ha katei ka kam pynïap bad kumta kum ka kur kan trei shitom ban wad ban lap ruh ïa kiwei pat ki runar thrang snam kiba la donktilang.
Ka kur Kharbani ka ai khublei ruh ïa baroh ki sengbhalang, ki kynhun nongñiah kali kiba la mih shakhmat ban pynrem ïa katei ka jingjia halor ka jingshah pynïap dusmon jong u para kur.
Ha katei ka jingïalang la ïadonlang ruh naduh u Bah Beststarwell Kharbani, President rangbah jong ka kurbah Kharbani, Bah Phranklin Kharbani, Vice-President Nongstoiñ, Bah Alfred Kharbani, Vice-President Shillong, bad kiwei-kiwei.
