Mawkyrwat, Lber:
U MLA ka Mawkyrwat, Bah Renikton Lyngdoh Tongkhar ha ka Sngi Ba-ar ha ryngkat ki ophisar ka tnat PWD naduh ki Karikor bad ki SDO ka PWD Mawkyrwat Division ki la hiar jurip ïa ka jingkieng ha Umshangkhar, South West Khasi Hills District kaba la dkut ha ka step jong ka 11 tarik u Lber ha ka por ba dang ïaid ka trok.
U Bah Renikton haba ïakren bad ki lad pathai khubor hadien ka jingjurip, u la ong ba ka long kaba shitom ban tip ïa ka daw jong ka jingkhyllem noh ka jingkieng namar kane ka jingkieng ka dei kaba la rim bad kaba la jan kynjoh sha ka 50 snem. U la ong ruh ba ka jingshna ïa kane ka jingkieng ha ki por mynshwa la shna ban ïaid ki kali rit bad ym shym la shna ban ïaid ki kali heh.
U la ïathuh ruh ba naduh ba kane ka surok ka la bha ki kali heh kum ki trok 12 bad16 shaka ki la pynlong surok-bah ïa kane ka lynti ban kit jingkit ha kaba ki nongñiah ruh kim kynmaw shuh ba kane ka jingkieng kam pat lah ban kit ïa ki kali heh. Ka jingïaid jong ki kali kiba kit mar khia ka la pynsynjor noh ïa kane ka jingkieng wat la ka jingkit kane ka trok ba hap la ithuh ba kam shym la kit bun. Hynrei, ka jingkit palat pud ki trok kiba mynshwa lehse ka lah ban long ka daw jong ka jingkhyllem noh kane ka jingkieng, la ong u Bah Renikton.
Ha kaba ïadei bad ka jingbym lait kali shuh, u Bah Renikton u la kyntu ïa ki paidbah ba kin ïai shah shipor bad u la pynpaw ruh ïa ka jingkmen ba na ka liang ka tnat PWD ka la shim khia ba kan shna noh da ka sub-way shipor bad u khmih lynti ruh ba tang ha ki khyndiat taïew ki paidbah ki la lah ban ïaid biang na kane ka surok.
U MLA u la kyntu ruh ïa ka sorkar ba kan bujli noh ïa kine jingkieng kiba la synjor bad u la ai khublei ïa ka sorkar kaba la don lypa ka jingthmu ne jingsdang ban shna thymmai noh ïa baroh ki jingkieng ba la sator.
“Ngin sa pyrshang ban lum jingtip na ka tnat ba dei peit, katno tylli ki dang don ki jingkieng kiba kum kine bad ngin sa thoh sha ka sorkar ban shna thymmai noh da ki jingkieng kiba khlaiñ kiba ïa biang katkum kane kajuk kaba mynta khnang ba kum kine ki jingjia kin nym jia shuh,” la ong u Bah Renikton.
