Jowai, Lber:
U kyrtong monlang jong ka Regional Democratic Alliance (RDA) Bah Robertjune Kharjahrin, ha ka janmiet 13 tarik Lber u la hiar sha ka thaiñ Amlarem ban ïalap ilekshon bad kumjuh ban pynshai paidbah ïa ki mat bad ki jingthmu ban ïaid nangne shakhmat na ka bynta ka ilekshon MP sha Lok Sabha.
Ïa ka jingïalang ha kane ka sngi la pynlong ha Umladkhur ba la pynïaid da u Bah Lahkmen Rymbui, MLA ka thaiñ ha ka jingdonlang ki heh ka UDP bad HSPDP kynthup u President UDP Bah Metbah Lyngdoh, President HSPDP Bah KP Pangniang, ki MLA ba kynthup Bah Renikton Tongkhar, Bah Nujorki Sungoh nalor kiwei kiwei.
U Bah Lahkmen Rymbui ha ka jingkren lamkhmat, u la ong kane ka por kadei ka por jong ka jingtynjuh bad hapoh ka ri India la sakhi ïa ki aiñ ba laiphew jait, don ki aiñ kiba pynmyntoi bad don ruh ki ktah ïa ki longdien-mandien.
Kumta donkam ban ïoh ïa u nongmihkhmat uba shemphang uba lah ban ïakren bad ka sorkar hapoh Delhi ban pynjem ïa ki aiñ na ka bynta ka bha ka miat ka roi ka par jong ka jylla bad ka jaidbynriew.
U President ka UDP Bah Metbah Lyngdoh u la ong ka jingïatreilang jong ki ar tylli ki seng riewlum ka dei namar ba ki paidbah ki angnud ba kine ar tylli ki seng saiñ pyrthei trai ri kin don ka jingïatreilang.
U la ong lada peit ïa ka saiñ hima-sima hapoh Meghalaya, kiba bun ki seng riewlum ki mih kawei hadien kawei pat. Ym shym don kawei ruh kaba neh haduh mynta lait noh tang kine ar tylli kiba la sdang naduh mynshwa ha ka por ba dang ïoh ïa ka Hill State.
U Robertjune Kharjahrin kum u kyrtong na ka Shillong Parliamentary Seat, u la pynsngew ïa ki mat ba kongsan eh kata ka long ban ïada ïa ka Ri bad ka Jaidbynriew na ka jingwan rung kyrthlep jong ki mynder ri hapoh ka ri, ban pynneh-pynsah ïa ki snap kiba kyrpang jong ka riti ka dustur u barim bajah bad ban kyntiew ïa ka Jylla bad ka ri ha ki liang baroh, ban ïada ïa ki hok kyrpang jong ka jaidbynriew khamtam ka hok ban mane blei laitluid.
“Baroh ngi kwah ïa ka synshar-khadar kaba khuid hynrei ka synshar-khadar kaba khuid ngin ïoh ïa ka tang lada ngi nang kumno ban pynkhuid ïa ka naduh ka por ba ngi jied ïa u ne ka nongmihkhmat, lada ngi jied da ka jingkhuid phin ïoh ïa u MP uba khuid, lada phi jied da ka jingtipbriew jingtipblei phin ïoh ruh ïa u MP uba tipbriew tipblei bad lada phi jied ïa u MP uba bat ïa la ka riti, ngin ïoh ruh ïa ki aiñ ki ban ïada ïa ka riti ka dustur,” u la ong.
“Ngi la dep kyrshan ïa u Bah Vincent H Pala, u dei u briew uba donburom donakor, ngam lah ban len ïa kata hynrei da kaba burom ïa u, ngim shym la ïohi ïa u soh bathiang ha kine ki 15 tylli ki snem. Kumta ka la dei ka por ban bujli bad pynkylla ïa u nongmihkhmat, bad ngi tyrwa ïa phi ïa kita ki mat ki jura ba ngin shimkhia naduh ka dohnud bad haduh ka jingmut jingpyrkhat”, la ong u Bah Kharjahrin.
