Shillong, Lber 15
Ka Shillong Lajong FC kan pynkhreh ïa ka jingïalehkai shabar na la ïing ha ka lympung ïalehkai I-League pyrshah ïa ka Namdhari FC ha ka Sngi Saitjaiñ ha ka por 3:30 janmiet ha Bhaini Sahib Stadium kaba ha Ludhiana.
Kane kan long ka jingïalehkai kaba arphew ïa kane ka kynhun ïaleh-kai ka nongbah ha kaba ka la jop phra sien, ïakhaid hynriew sien bad shah rem san sien. Te kumta kane ka kynhun ka la don 30 point bad ïai sah ha ka kyrdan ba hynriew ha kane ka lympung.
Dangshen ha ka jingïalehkai kaba la long ha kane ka nongbah, ka Lajong ka lah ban pynïakhaid mar 1-1 kol pyrshah ïa ka Real Kashmir. Kane ka la wan lyngba u rangïalehkai na Brazil Renan Paulino hashwa ban kut artad ka jingïalehkai.
Wat la ka Lajong kam shym la lah ban khur ïa ki 3 point, hynrei ka la pynhun ïa ka mynsiem ïa ki paidbah nongkyrshan namar ka la lah ban pynïakhaid mar shi kol pyrshah ïa katei ka kynhun kaba na Kashmir bad ym kumba ka la shah pynïakhaid ha ka Rajasthan FC ha kawei pat ka jingïalehkai kaba la lah ha la ïing.
Ha kawei pat ka liang ka Namdhari ka la don ha ka kyrdan balai na shatrai ha kaba ka la kamai tang 19 point na ki arphew sien ïakhun.
Te kumta baroh ar kine ki kynhun ki la khmih lynti ban khur ïa ki lai point ha kane ka jingïakhun.
