Nongstoiñ, Lber 15
Ka kynhun jong ka Regional Democratic Alliance (RDA), ha ka Sngi Thohdieng ka la hiar sha Langpih ban pynlong ïa ka jingïalang bad pynshai paidbah halor ki nongrim jong ka na bynta ka ilekshon MP.
Ha katei ka sngi nalor u Bah Robertjune Kharjahrin, kyrtong MP ka RDA, la donlang ruh u Bah Metbah Lyngdoh, MLA ka Mairang ha kajuh ka por kum u President ka UDP bad Chairman ka RDA, u Bah K.P. Pangniang, President ka HSPDP, u Bah Renikton Lyngdoh Tongkhar, MLA ka Mawkyrwat bad kiwei-kiwei.
Haba kren ha katei ka jingïalang, ka Kong Badariti halor ka jingkynthoh ba ka HSPDP ka dei ka ‘Team B’ jong ka NPP, ka la ong ba wat ym ngeit ïa kum kita ki ktien kiba shu kwah tang ban pynbiej ïa ki paidbah.
“Ngi leit ban kyrshan ïa ka Sorkar, balei ngi leit kyrshan ïa ka Sorkar namar ka juk ka la dawa, ki donkam ïa shibun ka roi ka par bad kiwei-kiwei ha ki konstitwensi jong ki bad halor kata ka nongrim ngi ïatreilang bad ka Sorkar hynrei ngin ym ïapeiñ ïa la ka jong ki nongrim. Ka UDP bad ka HSPDP kan ym kbum kan ym ïapeiñ ïa la ki jong ki nongrim ha kaba ïadei bad ka ïap ka im jong ka jaitbynriew,” la ong ka Kong Badariti.
Halor u MP ba la phah mynta la 15 snem, ka la ong ba kam pat ju ïohi ba u kren ïa ki jingeh jong ka jaidbynriew, katba u Bah Robert kum u nongïalam jong ka sengbhalang u hap ban mih sha surok ryngkat bad kiwei-kiwei ki nongïalam jong ki sengbhalang ban ïakhih ïa ka ILP, ban dawa ban pynrung ïa ka ktien Khasi ha ka Khyrnit kaba 8 bad kiwei-kiwei ki jingeh.
“Lada ngi dang bakla khun ka Ri ban jied ïa ki nongmihkhmat khamtam ïa u MP kumne sa san phew snem, ki jingangnud ki jingdonkam jong ka jaidbynriew ka jong ngi, ngin ym lah ban pynurlong,” ka la ong.
Ka Kong Badariti ka la ther tyngeh ruh halor ka jingïa kam ieid Jaidbynriew ha kaba ka la ong ba, “Jin lada phi ieid ïa ka jaidbynriew, balei da ma phi hi kiba kam ba dei ki khun Khasi-Khara phi mut ban pynkylla khongpong ïa ka dustur bad ïa kaei kaba la ai kynti da u longshuwa ïa ki kynthei.”
Shuh shuh ka la ong ba yn ieh ha ka jingstad jong ki paidbah ïano kin jied ha kane ka kynti kaba mynta.
Ka la bynrap ruh da kaba ong, “Jied beit, wat nym jied biej, wat nym biej ïa kito ki ktien kiba shu wan pynbiej ïa phi ha ka por ilekshon, wat nym biej ïa kito ki jingrwai kiba pynshongshit pynshad ïa phi ban shu leit thep vote. Wad ym jied ïa kiba shu wan ban kam ba ki sngew hok kat shaba leit ki shu ïalap ïa u Blei. Mano bym ieid ïa u Blei, mano bym pyrshang shakri ïa u Blei. Ban shu kynnoh tuh ban shu kynnoh bamsap kat ïa uba don, nga ong katta ka la bakla haba wan ïalap ilekshon.”
Na ka liang u Bah Robertjune Kharjahrin pat u la pynshai ba u la mih shakhmat ban ïakhun ïa ka ilekshon MP namar hadien ba u la trei kum u nongkitkam sengbhalang mynta la bun snem, la don ki jingïakhun, ki jingïakhih bad jingpynbor ruh ïa kiba bun ki kam bad u la don ryngkat ha kiba bun ki jingeh jong ka khia ka shon jong ki shibun bah jong u Hynñiewtrep ha kylleng ka Ri Khasi Jaiñtia.
“La dawa ïa kita ki lad jingïada lane ban kyntiew ïa ka jaidbynriew ha ki liang baroh. Kaba sngewsih ka long ba teng-teng la jop bad pynsngewthuh ha ka kyrdan ki MLA hynrei ynda la poi pat ha ka Sorkar India lane ha ka bynta ban ïathir bad ïatai ha Parliament, ki sahkut noh baroh,” u la ong.
U Bah Robert June u la ong ruh, “Lada ngin pynim ïa ka riti ka dustur, kan jia aïu lada ma ngi pat ngin phah ïa ki MP ki ba ïaleh pyrshah ïa ka dustur jong ngi, hato dang don kiba burom ïa ka riti ka dustur ka jong ngi.”
