Shillong, Lber 15
Ka lympung ïalehkai 3rd District League T20 Cricket Tournament 2024 ba la pynïaid da ka East Khasi Hills Cricket Association ka la nangjan shaphrang ha ka Sngi Thohdieng ha kaba ka Marbisu bad ka Pomshutia CC ki la ïoh jingjop.
Ha ka jingïakhun kaba nyngkong, ka Marbisu CC ka la pynliem noh ïa ka Thynroit CC da 7 run. Ka Marbisu kaba la kam trai ban tied nyngkong ka la ïoh 122 run bad shah pynhap 6 wiket ha ki 20 over. U Dapkupar Nongrum u la tied 24 na ki 49 bol. Katba u Everest Warjri u la shim 2 wiket.
Haba wan beh ïa ka thong ka Thynroit CC ka la ïoh tang 115 run bad shah pynhap 6 wiket ha ki 20 over. U Osric Herbert Wanswett u la tied 36 run na ki 34 bol. Katba u Shalen Kurbah u la shim 2 wiket. Ïa ka nam Player of the Match la ïoh da u Kyntiewdorlang Sun.
Haba phai sha kawei pat ka jingïakhun kaba ar, ka Pomshutia CC ka la jop da 14 run ïa ka Mawphlang CC. Ka Pomshutia haba shimti ban tied nyngkong, ka la ïoh 135 run bad shah pynhap 8 wiket ha ki 20 over. U Donkupar Syiemlieh u la tied 22 run na ki 14 bol. Katba u Janailang Dohtdong u la shim 2 wiket.
Haba wan beh ïa ka thong, ka Mawphlang ka la ïoh tang 121 run bad shah pynhap 7 wiket ha ki 20 over. U Nativity Mawphlang u la tied 18 run na ki 18 bol. Katba u Shembhalang Pyngrope u la shim 3 wiket. Ïa ka nam Player of the Match la ïoh da u Donkupar Syiemlieh.
