Shillong, Lber 15
U nongïalam ka National People’s Party (NPP), Bah Sniawbhalang Dhar, u la kren skhem ba ka NPP kan ïoh jingjop beit ha kane ka ilekshon Lok Sabha. Nangta, u kynthoh ruh ïa kiwei ki seng da kaba ong ba ka Congress ka don ha ICU katba ka United Democratic Party (UDP) bad ka Voice of People Party (VPP) kim poi shano-shano namar ki kut ha Byrnihat.
U la ong ba ym don jingmut ban jied biang ïa u MP ka Congress u Bah Vincent H Pala na Shillong namar ka Congress ka la don ha ICU, bad ym don jingmut ban ai vote ïa u kyrtong ka UDP bad VPP namar ki kut tang ha Khanapara.
Haba pan jingkyrshan na bynta ka kyrtong NPP ka Kong Ampareen Lyngdoh, u la ong ba ki don 4 ne 5 ngut ki kyrtong kiba ïakhun ha kane ka ilekshon Lok Sabha na Shillong. U la ong ba ka UDP bad VPP kim lah ban poi jngai namar ki kut ha Byrnihat bad ki paidbah naduh ki bym dei trai muluk bad paid Garo kim kyrshan.
U la ong ruh ba ka Congress kaba long ka seng kaba rim, hynrei mynta ka don ha ICU bad ym lah ban tip kaei ka ban jia ïa kane ka seng kaba don tang 5 ngut ki MLA ha Meghalaya. Kane ka seng kaba synshar ïa ka ri kaba la ritpaid sa tang 50 ngut ki MP bad ha kane ka ilekshon ym tharai ba kan dang tam palat 40 ngut.
“Namar kata balei ngin shu phah biang ïa u MP ka Congress namar lada phah ïa u MP ka Congress ngi ïakhun ïa ka thma kaba la rem lypa,” u la kynthoh shuh shuh.
Kumta u la kam ba ki paidbah mynta ki don ka lad sa tang ban kyrshan ïa ka NPP bad ka kyrtong ka Kong Ampareen Lyngdoh, bad ki paidbah ki dei kiba biang tam ban bishar ïa ki kam jong u Bah Pala ha kine ki 15 snem.
Ki surok kum ka Four Lane na Jorabat sha Umïam bad ka Shillong Bypass na Lad Umroi sha Mawryngkneng ka urlong naduh ba long MP u Bah Pala nalor ka surok Shillong-Nongstoiñ-Tura kaba la ïarap ban weng ïa ka dheng kali ha shilynter ka surokbah Shillong-Guwahati bad Shillong-Jowai lyngba ka jingdon ka Shillong Bypass.
Ha kawei pat ka liang, u Bah Sniawbhalang Dhar u la ong ba u la kren ïa ka Sorkar Pdeng ban mang pisa ban shna ïa ka surok kaba ngiam 8 tylli ki kali na Khanapara sha Byrnihat bad ka surok Four Lane na Umroi shaduh Rilum Jaiñtia ka ban ïarap ban weng ïa ka dheng kali kaba nang buh jingeh.
