Shillong, Lber 15
U President ka BJP-Meghalaya, u Rikman G. Momin ha ka Sngi Thohdieng u la ong ba ka mat halor ka Citizenship Amendment Act (CAA) ka dei ka lynnong kaba la khylliap na bynta ka Jylla.
“Ka BJP hapoh ka Jylla ka kwah ban pynpaw ïa ka jingsngewnguh sha ka Sorkar India bad khamtam ïa u Myntri Rangbahduh ka ri, u Narendra Modi, bad Myntri ka tnad kam pohïing ka Sorkar Pdeng, u Amit Shah kiba la burom ïa ki jingsngew jong ki ‘riewlum da kaba pyllait ïa ka jingtreikam jong ka CAA na ki jaka ba hap hapoh ka Khyrnit Hynriew,” la ong u Momin haba kren sha ki lad pathai khubor.
Haba kdew ba kam shym la don ka jingpyllait ïa ki jaka ba hap hapoh ka Khyrnit Hynriew ha ka aiñ (Original Act) jong u snem 1955, u President u la ong ba ïa kane ka jingpyllait la wanrah ha u ka aiñ jong u snem 2019 da ka Sorkar BJP.
“Ka BJP ka don jingsngew halor ka bha ka miat jong ki ‘riewlum bad kumta ka la wanrah ïa kane ka jingpyllait treikam jong ka aiñ. Ka Sorkar BJP ka ngeit ban kynthup lang ïa baroh, wat la mynjur ïa ka aiñ ha u snem 2019 – ka Sorkar ka la ïamir jingmut 4 snem ha shuwa ban mih shakhmat bad ki kyndon,” la ong u Momin.
U la ong ruh ba katei ka sienjam kaba la shim da ka Sorkar Pdeng ka pynkynmaw biang ïa ka jingminot jong ka Sorkar hapoh ka jingïalam u Modi ban kyntiew ïa ka jingim jong ki ‘riewlum lyngba ki skhim bapher-bapher ka Sorkar.
“Mynta ba la pyllait ïa ka CAA na ka Jylla, kam don jingmut ïa kito kiba pyrshah, hynrei kum ki nongshong shnong jong kane ka ri bakhraw, ngi dei ban ïatreilang na bynta ka jingkiew bad jingriewspah jong ka,” u la ong.
Utei u nongïalam u la pynkynmaw ba dang shen, `15,000 klur la buh bynta ban pynbha ïa ka surok na Umroi sha Silchar – na ka 2 ‘lane’ sha ka 4 ‘lane’ kaba long ka sakhi ïa ka ‘agenda’ ka Sorkar u Modi kaba long na bynta u paidbah bad ka roi ka par.
U la bynrap ba ka BJP hapoh ka Jylla ka khot ka wer ïa ki nongshong shnong ban kyrshan ïa ki kyrtong jong ka seng na bynta ka ilekshon ban wan sha ka Lok Sabha khnang ba ka Meghalaya kum ka Jylla kan ïoh pdiang bun bah ki jingmyntoi da kaba phah ïa 2 ngut ki MP na ka BJP ha kane ka kynti.
Ha kawei ka liang, u khlieh nongaiktien ka seng, u Bah M. Kharkrang haba pynshai halor katei ka bynta, u la ong, “Ka jaka bym hap hapoh ka jingkhmih ka Khyrnit Hynriew ha baroh kawei ka Jylla ka long tang kumba 1 sq.km bad nga tikna ba ngim don ki briew kiba sah ha kitei ki jaka ki ban donkam ban aplai ïa ka jinglong nongshong shnong hapoh jong kane ka aiñ.”
Haba pynkynmaw biang ba ïa ka CAA la mynjur ha u snem 2019, u la ong ba lada peit ïa kaei kaba u Myntri Rangbahduh u kren na ka por sha ka por ba u bat la ka kular – kane ka dei ka kular kaba u la khlei ha ka ilekshon ba la dep bad jia ryngkhat ka la wan jia ha kajuh ka por, la thaw ïa ki kyndon bad la pdiang ha shuwa ka ilekshon, hynrei ka aiñ ka la mih ha u snem 2019.
Shuh shuh haba kylli, u la ong, “Ha kano ka rukom yn shah ïa ka jingwan rung be-aiñ kiba nabar namar kane ka aiñ ka dei na bynta kito kiba rung shapoh ka Jylla ha shuwa ka 31 tarik u Nohprah, 2014. Mynta kumno phin ïoh ïa ka jingwan rung thymmai, tang namarba la mynjur ïa kane ka aiñ, kumno phin don ïa kiba nabar ki ban wan rung thymmai shapoh naba ka tarik la long 31 u Nohprah, 2014. Mynta kumno phin don ïa kiba thymmai, yn ym kheiñ ïa kiba thymmai.”
