Gaza, Lber:
Ka tnat ba kyrpang jong ka United Nations kaba dei peit ia ki phetwir nong Palestine hapoh Gaza, ka la pyntip ba uwei na ki dkhot katei ka tnat u la duh noh ia ka jingim na ka jingther bom jong ka Israel ha ka Sngi Balang, katba ki kynhun jong katei ka tnat ki dang leit ban sam bam ha ka jaka sam jingiarap jong ka UN hapoh Gaza.
Kumta la ong ba katei ka tnat jong ka UN ha ka Sngi Palei ka la pyntip ba uwei u dkhot jong ka tnat UNRWA u la khlad noh bad kumba 22 ngut pat ki la mynsawh ha ka por ba ki shipai ka Israel ki la ther bom sha katei ka jaka sam marbam sha ki paidbah ka Gaza kaba don sha ka phang Mihngi jong ka Rafah.
Haba iadei bad kane, ki shipai ka Israel kim shym la pynphai ktien ne kren eiei halor katei ka jingleit ther bom jongki sha katei ka bynta ba don ka jaka sam bam bad jaka sam jingiarap sha ki paidbah nongshong shnong ka Gaza.
Ka tnat ka koit ka khiah jong ka Gaza ha ki khyndiat kynta ba la leit, ka la pyntip ba ki don 4 ngut kiba la ngat bad khlad ha katei ka jingther bom jong ka Israel sha katei ka jaka buh marbam ba dei khmih da katei ka tnat jong ka United Nations.
Katei ka jingjia ha ka Sngi Balang, ka la long ruh ha kum kane ka por ba ki ri ka pyrthei ki dang ialeh ban leit pynpoi ia ki mar jingiarap bad khamtam ki marbam sha ki paid nongshong shnong ka Gaza, da kaba ki leit ban phah pynhap ia kitei ki jingiarap jong ki da ki liengsuiñ shipai hadien ba la iohi ba ka Israel bad ka Hamas kim shym sngap ia ka jingkyntu bad jingkyrpad ban sangeh noh shipor ia ka thma khnang ba yn ioh ban pynpoi ia kitei ki lad jingiarap sha ki paid nongshong shnong jong ka Gaza.
Ka nongrah ktien jong ka UNRWA ka la iathuh ba katei ka jaka ba la shah pyn julor ha ki bom ka Israel ka dei kaba ju pyndonkam ban buh bad sam ia ki marbam bad ki tiar kiba kongsan tam naka bynta ki paidbah nongshong shnong sha ka phang South jong ka nongbah Gaza.
Haba iadei bad kane, la ong ba ki don palat 165 ngut ki nongtrei lane ki dkhot jong ka UNRWA kiba la khlad bad duh noh ia ka jingim naduh kaba sdang jong ka thma Israel bad ki lehnoh Hamas ha u Risaw jong u snem ba la leit tad haduh kane ka kynti.
