Adokgre, Lber 15
Kum ka jingbteng ïa ka dustur ba la sdang da u Purno Agitok Sangma (Bam Kwai ha Dwar U Blei), ka National Peoples’ Party (NPP) ha ka Sngi Thohdieng ka la sdang ïa ka jingïalap ilekshon jong ka na Adokgre, North Garo Hills.
Ka Adokgre kaba la ai kyrteng “Chenanggre” ne ka jaka jong ka jingjop ka la long ka Madan ïalap ilekshon na bynta u Purno Sangma. Ha u 2016, u Conrad K. Sangma, u la shimti kum u National President jong ka seng bad bteng ïa kane ka dustur kaba la neh mynta la palat 30 snem.
Baroh ki heh ki haiñ jong ka seng ba kynthup ïa u State President, Bah Prestone Tynsong, MP ka Rajya Sabha, Dr. W.R. Kharlukhi, State Working President, u Marcuise Marak, lem bad kiwei-kiwei ki la ïalum lang ha Adokgre ban sdang ïa ka jingïalap ilekshon ka seng.
Ki kyrtong ka seng ba kynthup ïa ka Dr. Ampareen Lyngdoh (Shillong Parliamentary konstitwensi) bad ka Agatha K. Sangma (Tura Parliamentary konstitwensi) ki la ïadonlang ha kane ka sngi.
Haba ai jingkren ha ka jingïalang, u National President ka NPP bad Myntri Rangbah ka Jylla, u Conrad K. Sangma u la ong, “La ka dei ka ilekshon MP, MLA ne MDC, u kpa jong ngi, u P.A. Sangma u ju sdang beit ïa ka jingïalap ilekshon na Adokgre namar u ngeit ha ka jingjop bad kumta ka kyrteng ‘Chenanggre’. Ka ju sdang na i barit, bad mynta ngi ïeng hakhmat jong phi na ka Stadium ban pynurlong ïa ki jingangnud u nongïalam jong ngi.”
U la ong ba haba phai sha Meghalaya khamtam ïa ka Ri-lum Garo – la sakhi ïa ka jingkylla ba radbah ha kine ki 6 snem ba la leit.
“Kham ha shuwa, lada ki surok ki bha, kata ka jingngeit ka long ba ka jaka ka dei jong ka Assam, katba ki surok sniew ki kdew ïa ka Ri-lum Garo. Mynta kam long shuh kumne,” u la ong.
Haba kyrpad ‘vote’ na bynta ka Agatha, utei u khlieh nongïalam ka NPP u la ong, “Mynta, ka khun jong u P.A. Sangma ka ïeng hakhmat jong phi ban pan ka jingkyrshan na phi. Ngin ym lah klet ïa u P.A Sangma (Bam Kwai ha Dwar U Blei).” U la ong ruh ba kane ka ilekshon ka long kaba donkam ïa ka NPP bad pynpaw ka jingkyrmen skhem bad ka jingjop kan tam ïa ka 1.90 lak kaba u la ïoh haba u la ïakhun ïa ka ilekshon shiteng samoi hadien ka jingkhlad noh u P.A Sangma ha u 2016.
“Nga kyrmen skhem ba ngin da jop kput ha kane ka ilekshon bad kan ym duna ïa ka 2.50 lak ne wat ïa ka 3 lak,” la ong u Sangma.
