Shillong, Lber:
Wat la ka seng Bharatiya Janata Party (BJP) kam pat pynbna ïa kyrteng ki kyrtong ban ïakhun ïa ka ilekshon MP na ar tylli ki konstitwensi ha Meghalaya, u President barim ka BJP u Bah Ernest Mawrie u la pyntip ba ki nongtrei ka seng ki kwah ba ïa ka tiket dei ban ai sha kito kiba dei na ka seng bad kiba tip ïa ka nongrim jong ka seng.
Kumba ka long mynta ki nongïalam ka BJP Sengkmie ki la dep ban pynbna ïa ka kyrteng jong ki kyrtong ha ka thup kaba nyngkong hynrei ym pat shym la kynthup ne kdew ïa ki kyrtong na Meghalaya.
Lah ban pynkynmaw ruh ba ki la don haduh kumba saw ngut kiba la pynpaw ka jingkwah ban ïoh tiket ban ïakhun na Shillong Parliamentary Constituency ba kynthup ïa u Myntri Sorkar Bah A.L Hek, Kong Fenela Nonglait, Bah Ernest Mawrie bad uwei u nongïalam ki samla BJP.
Haba kren ha u nongthoh khubor ha ka Sngi Ba-ar, u Bah Ernest Mawrie u la ong ba ka jingmih shakhmat ban pan tiket ka long hadien ba ki nongtrei ka BJP na baroh kawei ka Shillong Constituency ki la kyrpad ïa u ban ïakhun ïa ka ilekshon MP ka ban sa long shen.
“Ki nongtrei ka seng ki sngew ba nga dei ban mihshakhmat ban ïakhun ïa ka ilekshon, naba ki shim ïa nga kum ka dur jong ka seng,” u la ong.
Halor ka jingkylli, u Bah Mawrie u la ong ba ka jingjied ïa ki kyrtong ka long kaba donkam na ka bynta ka seng ba kan jop naba kino-kino kiba ïoh ïa ka tiket BJP ki dei ban don ruh ïa ka jingkyrshan jong ki nongtrei ban jop pat ïa ka ilekshon.
“Kumno ka BJP kan jop ïa ka ilekshon, kane baroh kan shong eh ba ïano ka seng kan ai ïa ka tiket ban ïakhun,” u la ong.
Kham ha shwa, u Bah Mawrie u la ong ruh ba ka jingïoh ‘vote’ jong ka BJP ha Meghalaya ka la kiew la ka dei ha ka ilekshon MLA kaba dang shu dep ne wat ha ka ilekshon sha ka ïingdorbar Lok Sabha.
