Shillong, Lber 15
Ki khynnah skul kiba thoh eksamin matrik jong ka Secondary School Leaving Certificate (SSLC) 2024 ha ka 15 tarik u Lber 2024 kaba dei ruh ka sngi kut ban thoh eksamin hadien ba ki la mih na ki kamra thoh eksam ki la ud la nam ha kaba ïadei bad ka rukom ai ïa ki jingkylli da ka Meghalaya Board Of School Education (MBOSE) ki bym ïadei satia katkum na ka kot pule ba ki la pynkhreh bad trei shitom baroh shisnem.
Haba ïoh ban ïakren bad katto-katne ngut ki khynnah skul na ki skul bapher-bapher kiba wan thoh eksam ha KJP Higher Secondary School, Shillong ki la pynpaw ïa ki jingeh namar ka rukom ai ïa ki jingkylli da ka MBOSE ha ka sobjek Social Science mynta u snem ka khlem wan katkum na ki kot kiba ki la pynkhreh shitom. Ki la pynpaw ba kiwei-kiwei ki sobjek wat lada ki eh makna ruh ki lah ban thoh ne thaw hi bad ki dang don hi ki jingkylli kiba wan na ki kot ba ki lah pynkhreh. Hynrei ïa ka Social Science pat kim lah satia ban leh kumta namar bun tylli ki jingkylli ki khlem wan katkum na ki kot ba ki la pule.
“Ngi khlem mutdur kiei ki jingkylli kiba wan mynta ka sngi hynrei ngi lah mutdur beit ba ki wan da ki jingkylli kiba ngi la dep pynkhreh”, la ong kitei ki khynnah skul.
Kitei ki khynnah skul ki la ong ba marsien ïohi ïa ka kot jingkylli ha shwa ban thoh ïa ka eksamin ki la ktha khlieh bad sngew kum ban ïam hadien ba ki la ïohi ïa ka rukom ai ïa ki jingkylli. Ki la ong ruh ba ki duh thiah duh dem bad ki hap ban thiah tang 2 ne 3 kynta ban pule ïa ka Social Science hynrei kane ka jingtrei shitom jong ki ka la long lehnohei noh.
“Ynda ngi la ïohi ïa ki jingkylli, nga sngew ba ki ummat kin jaw namar ba ka la long shabar na ka kot, ka long kaba eh ïa ngi namar ngi la pynlut kai ka por bad ka bor bad baroh ka la long lehnohei noh”, la ong kitei ki khynnah skul.
Shuh shuh kitei ki khynnah skul ki la ong ba ki kyrmen skhem ba ka MBOSE kan ïarap lem ïa ki khamtam lei-lei ba ki la da pynkhreh shitom baroh shisnem bad kumjuh ruh ki nonghikai ki la ai kaba bha tam ka jinghikai hynrei ka jinghikai jong ki nonghikai ruh bad ki jingkylli kiba la wan ha katei ka sngi kam i shongkhia namar ki nonghikai ki la hikai na ki kot barim katba ki jingkylli kiba la wan pat ki dei na ki kot bathymmai.
“Ka jingkyrpad jong ngi na ka MBOSE bad na ka sorkar hi ka long ba kin isynei lem ïa ngi tang ba ngin ïoh ïa ka ‘pass mark’ ruh namar ka eh bha ïa ngi”, la ong kitei ki khynnah skul.
