Shillong, Lber 15
Haduh 249 ngut ki nongïalehkai ryngkat ki coach bad manager ka Jylla ka la sei ba kin leit shim bynta ha ka 3rd North East Games 2024 ka ban long ha Nagaland naduh 18 haduh 23 tarik mynta u bnai.
Ka jingjied ïa kitei ki nongïalehkai ka long hadien ba ki la lah ban pynpaw ïa ka jingtbit ha ka 5th Meghalaya Games kaba la long dangshen mynta u snem ha Tura.
Kine ki nongïalehkai kin ïashim bynta ki 14 tylli ki jingïalehkai kiba kynthup ïa ka Archery, Athletics, Badminton, Basketball, Boxing, Football, Belt Wrestling, Freestyle Wrestling, Lawn Tennis, Pencak Silat, Table Tennis, Taekwondo, Volleyball bad Wushu.
Ha shwa ba kane ka kynhun kan mih na kane ka nongbah, na ka liang ka Meghalaya State Olympic Association lem bad ka tnat ïalehkai ki la pynlong ka jingïalang ha ka sngi Thohdieng ha SSA Stadium, Shillong na ka bynta ban ai khublei kitbok kitrwiang ïa baroh ki nongïalehkai bynta ba kin ïalehkai bha ha katei ka lympung.
Ha kane ka jingïalang kaba lyngkot la iadonlang ka Director ka tnat ïalehkai Kong Iasawanda Laloo, kumjuh u Working President ka MSOA Bah John F. Kharshiing, u General secretary Bah Finely Pariat, u Assistant Director Bah Païa War Nongbri, ka President ka Archery Associa-tion of Meghalaya Kong Matsiewdor War Nongbri bad kiwei.
Haba ai jingkren ha kane ka sngi ka Kong Iasawanda ka la kyntu ïa baroh ki nongïalehkai ba kin ïalehkai bha ha katei ka lympung khnang ba ki lah ban wanrah jingjop ïa ka Jylla. “Phi dei ban husiar na kaba pynsaphriang ïa ki khubor lamler hapoh ki rynsan social media, hynrei phi dei ban pynleit jingmut ban pyni ïa ki sap ialehkai ba kyrpang khnang ba phi lah ban khur takma.
Na ka liang ka Sorkar Jylla ka la pynbiang ïa ki lad jingïarap na ka bynta jong baroh ki nongïalehkai kiba la wanrah burom ïa ka jylla da kaba khur takma ha ki lympung ïalehkai bapher bapher. “Kane ka jingai jingïarap ka Sorkar ka long ban kyrshan ïa phi khnang ba phi lah ban ïai bteng ha ki kam ïalehkai bad ïai trei shitom khnang ba ph lah ban kynjoh sha ka thong.”
“Haba phi phong ïa ka jersey jong ka Meghalaya phi dei ban pyni ïa ka mynsiem ïakhun bad ba kim dei ban mih ki jingshah kynthoh pyrshah ïa phi wat la ki lah ban don ki jingeh ha kano kano ka bynta. Haba phi don kino kino ki jingeh pyntip sha ki nongïalam jong phi bad ym ban pynsaphriang ïa ki khubor ki bym sngwetynnad ha ki rynsan social media.
La pynkut ïa kane ka jingïalang da ka jingdwai ban kyrkhu kyrdoh ia kitei ki nongialehkai shynrang bad kynthei khnang ba kin kin trei shitom bad ban ïalehkai bha ha katei ka lympung.
